aaj lab e guhar fishaan aap ne vaa nahin kiyaa

Aaj lab-e-guhar-fishaan aap ne vaa naheen kiyaa Tazkira-e-khajista-e-aab-o-havaa naheen kiyaa Kaise kahen ki tujh ko bhee ham se hai vaasta koee Too ne to ham se aaj tak koee gila naheen kiyaa Jaane tiree naheen ke saath kitne hee jabr the ki the Main ne tire lihaaz men teraa kahaa naheen kiyaa Mujh ko ye hosh hee na thaa too mire baazuon men hai Ya.anee tujhe abhee talak main ne rihaa naheen kiyaa Too bhee kisee ke baab men ahd-shikan ho ghaaliban Main ne bhee ek shakhs kaa qarz adaa naheen kiyaa Haan wo nigaah-e-naaz bhee ab naheen maajraa-talab Ham ne bhee ab kee fasl men shor bapaa naheen kiyaa