darakht e zard nahin maaluum zaryuun ab tumhaarii umr kya hogii

Nahin ma.aloom 'zaryoon' ab tumhaaree umr kya hogee Vo kin khawabon se jaane aashnaa naa-aashnaa hogee Tumhaare dil ke is dunya se kaise silsile honge Tumhen kaise gumaan honge tumhen kaise gile honge Tumhaaree sub.h jaane kin khayaalon se nahaatee ho Tumhaaree shaam jaane kin malaalon se nibhaatee ho Na jaane kaun dosheeza tumhaaree zindagee hogee Na jaane us kee kya baayastagee shaa.istagee hogee Use tum phone karte aur khat likhte rahe hoge Na jaane tum ne kitnee kam ghalat urdu likhee hogee Ye khat likhnaa to daqyaanoos kee peeDhee kaa qissa hai Ye sinf-e-nasr ham naa-baalighon ke fan kaa hissa hai Vo hanstee ho to shaayad tum na rah paate ho haalon men GaDhaa nanhaa saa paD jaataa ho shaayad us ke gaalon men Gumaan ye hai tumhaaree bhee rasaa.ee naa-rasaa.ee ho Vo aa.ee ho tumhaare paas lekin aa na paa.ee ho Vo shaayad maa.ide kee gand biryaanee na khaatee ho Vo naan-e-be-khameer-e-maida kam-tar hee chabaatee ho Vo dosheeza bhee shaayad daastaanon kee ho dil-daada Use ma.aloom hogaa 'zaal' tha 'sohraab' kaa daadaa Tahamtan ya.anee 'rustam' tha giraamee 'saam' kaa vaaris Giraamee 'saam' tha sulb-e-nar-e-'maanee' kaa khush-zaada (ye meree ek khwaish hai jo mushkil hai) Vo 'najm'-aafandi-e-marhoom ko to jaantee hogee Vo nauhon ke adab kaa tarz to pahchaantee hogee Use kad hogee shaayad un sabhee se jo lapaaDee hon Na honge khvaab us kaa jo gavayye aur khilaaDee hon Hadaf honge tumhaaraa kaun tum kis ke hadaf hoge Na jaane waqt kee paikaar men tum kis taraf hoge Hai ran ye zindagee ik ran jo barpaa lamha lamha hai Hamen is ran men kuch bhee ho kisee jaanib to honaa hai So ham bhee is nafas tak hain sipaahee ek lashkar ke Hazaaron saal se jiite chale aa.e hain mar mar ke Shuhood ik fan hai aur meree adaavat be-fanon se hai Miree paikaar azal se Ye 'khusro' 'meer' 'ghaalib' kaa kharaaba bechtaa kya hai Hamaaraa 'ghaalib'-e-aazam tha chor aaqa-e-'bedil' kaa So rizq-e-fakhr ab ham khaa rahe hain 'meer'-e-bismil kaa Sidhaarat bhee tha sharminda ki do-aabe kaa baasee tha Tumhen ma.aloom hai urdu jo hai paalee se niklee hai Vo goyaa us kee hee ik pur-numoo Daalee se niklee hai Ye kaDvaahaT kee baaten hain miThaas in kee na poochho tum Nam-e-lab ko tarastee hain so pyaas in kee na poochho tum Ye ik do jur.on kee ik chuhl hai aur chuhl men kya hai Avaamunnaas se poochho bhalaa al-kuhl men kya hai Ye ta.an-o-tanz kee harza-saraa.ee ho nahin saktee Ki meree jaan mere dil se rishta kho nahin saktee Nasha chaDhne lagaa hai aur chaDhnaa chaahiye bhee tha Abas kaa nirkh to is waqt baDhnaa chaahiye bhee tha Ajab be-maajraa be-taur be-zaaraana haalat hai Vajood ik vahm hai aur vahm hee shaayad haqeeqat hai Gharaz jo haal tha wo nafs ke baazaar hee kaa tha Hai ''ze'' baazaar men to darmiyaan 'zaryoon' men avval To ye ibraafaneeqee khelte harfon se the har pal To ye 'zaryoon' jo hai kya ye aflaatoon hai koi Amaan 'zaryoon' hai 'zaryoon' wo ma.ajoon kyuun hota Hain ma.ajoonen mufeed ''arvaah'' ko ma.ajoon yuun hota Suno tafreeq kaise ho bhalaa ashkhaas o ashyaa men Bahut janjaal hain par ho yahaan to ''yaa'' men aur ''yaa'' men Tumhaaree jo hamaasa hai bhalaa us kaa to kya kahnaa Hai shaayad mujh ko saaree umr us ke sehr men rahnaa Magar mere ghareeb ajdaad ne bhee kuch kiyaa hogaa Bahut tuchchaa sahee un kaa bhee koi maajraa hogaa Ye ham jo hain hamaaree bhee to hogee koi nauTankee Hamaaraa Khoon bhee sach-much kaa sehne par bahaa hogaa Hai aakhir zindagee Khoon az-bun-e-naakhun bar-aavar-tar Qayaamat saaneha matlab qayaamat faaje.a parvar Naheen ho tum mire aur meraa fardaa bhee nahin meraa So main ne saahat-e-deeroz men Daalaa hai ab Deraa Mire deeroz men zahr-e-halaahal tegh-e-qaatil hai Mire ghar kaa vahee sarnaam-tar hai jo bhee bismil hai Guzasht-e-waqt se paimaan hai apna ajab saa kuch So ik ma.amool hai imraan ke ghar kaa ajab saa kuch 'hasan' naamee hamaare ghar men ik 'suqraat' guzraa hai Vo apnee naf.i se isbaat tak ma.ashar ke pahunchaa hai Ki khoon-e-raa.egaan ke amr men paDnaa nahin ham ko Vo sood-e-haal se yaksar ziyaan-kaaraana guzraa hai Talab thee Khoon kee qai kee use aur be-nihaayat thee So fauran bint-e-ash.ash kaa pilaayaa pee gaya hogaa Vo ik lamhe ke andar sarmadiyyat jee gaya hogaa Tumhaaree arjumand ammee ko main bhoolaa bahut din men Main un kee rang kee taskeen se nimTaa bahut din men Vahee to hain jinhon ne mujh ko paiham rang thukvaayaa Vo kis rag kaa lahoo hai jo miyaan main ne nahin thookaa Lahoo aur thooknaa us kaa hai kaarobaar bhee meraa Yahee hai saakh bhee meree yahee me.aar bhee meraa Main wo hoon jis ne apne Khoon se mausam khilaa.e hain Na-jaane waqt ke kitne hee aalam aazmaa.e hain Main ik taareekh hoon aur meree jaane kitnee faslen hain Miree kitnee hee faren hain miree kitnee hee aslen hain Havaadis maajraa hee ham rahe hain ik zamaane se Shadaa.ed saaneha hee ham rahe hain ik zamaane se Hamesha se bapaa ik jang hai ham us men qaa.em hain Hamaaree jang khair o shar ke bistar kee hai zaa.ida Ye charkh-e-jabr ke davvaar-e-mumkin kee hai girveeda LaDaa.ee ke liye maidaan aur lashkar nahin laazim Sinaan o gurz o shamsheer o tabar khanjar nahin laazim Bas ik ehsaas laazim hai ki ham buadain hain donon Ki nafi-e-ain-e-ain o sar-ba-sar ziddain hain donon Luis-urbina ne meree ajab kuch gham-gusaaree kee Ba-sad dil daanishee guzraan apnee mujh pe taaree kee Bahut us ne pilaa.ee aur piine hee na dee mujh ko Palak tak us ne marne ke liye jiine na dee mujh ko ''main tere ishq men ranjeeda hoon haan ab bhee kuch kuch hoon Mujhe teree khayaanat ne ghazab majrooh kar Daalaa Magar taish-e-shadeedaana ke ba.ad aakhir zamaane men Razaa kee jaavidaana jabr kee naubat bhee aa pahunchee'' Mohabbat ek paspaa.ee hai pur-ahvaal haalat kee Mohabbat apnee yak-tauree men dushman hai mohabbat kee Sukhan maal-e-mohabbat kee dukaan-aaraa.ee kartaa hai Sukhan sau tarah se ik ramz kee rusvaa.ee kartaa hai Sukhan bakvaas hai bakvaas jo Thahraa hai fan meraa Vo hai ta.abeer kaa aflaas jo Thahraa hai fan meraa Sukhan ya.anee labon kaa fan sukhan-var ya.anee ik pur-fan Sukhan-var iizad achchhaa tha ki aadam yaa phir ahriman Mazeed aankee sukhan men waqt hai waqt ab se ab ya.anee Kuchh aisa hai ye main jo hoon ye main apne sivaa hoon ''main'' So apne aap men shaayad nahin vaaq.e huaa hoon main Jo hone men ho wo har lamha apna ghair hota hai Ki hone ko to hone se ajab kuch bair hota hai Yoonhee bas yoonhee 'zenoo' ne yakaayak khud-kushee kar lee Ajab hiss-e-zaraafat ke the maalik ye ravaaqee bhee Bidah yaaraa azaan baada ki dahqaan parvard aan-raa Ba sozad har mata-e-intimaa.e doodmaanan raa Ba-sozad iin zameen-e-aitbaar-o-aasmaanaan raa Ba-sozad jaan o dil raaham bayaasaayad dil o jaan raa Dil o jaan aur aasaa.ish ye ik kaunee tamaskhur hai Humuq kee abqariyyat hai safaahat kaa tafakkur hai Humuq kee abqariyyat aur safaahat ke tafakkur ne Hamen taz.ee-e-mohlat ke liye akvaan bakhshe hain Aur aflaatoon-e-aqdas ne hamen aayaan bakhshe hain Suno 'zaryoon' tum to ain-e-a.ayaan-e-haqeeqat ho Nazar se duur manzar kaa sar-o-saamaan-e-sarvat ho Hamaaree umr kaa qissa hisaab andoz-e-aanee hai Zamaanee zad men zan kee ik gumaan-e-laazimaanee hai Gumaan ye hai ki baaqee hai baqaa har aan faanee hai Kahaanee sunne vaale jo bhee hain wo khud kahaanee hain Kahaanee kahne vaalaa ik kahaanee kee kahaanee hai Piyaa pe ye gudaazish ye gumaan aur ye gile kaise Sila-sozee to meraa fan hai phir is ke sile kaise To main kya kah raha tha ya.anee kya kuch sah raha tha main Amaan haan mez par yaa mez par se bah raha tha main Ruko main be-sar-o-paa apne sar se bhaag niklaa hoon Ilaa yaa ayyuhal-abjad zaraa ya.anee zaraa Thahro There is an absurd i in absurdity shaayad Kaheen apne sivaa ya.anee kaheen apne sivaa Thahro Tum is absurdity men ik radeef ik qaafiya Thahro Radeef o qaafiya kya hain shikast-e-naa-ravaa kya hai Shikast-e-naaravaa ne mujh ko paara paara kar Daalaa Anaa ko meree be-andaaza-tar be-chaara kar Daalaa Main apne aap men haaraa hoon aur khvaaraana haaraa hoon Jigar-chaakaana haaraa hoon dil-afgaaraana haaraa hoon Jise fan kahte aa.e hain wo hai khoon-e-jigar apna Magar khoon-e-jigar kya hai wo hai kattaal-tar apna Koee khoon-e-jigar kaa fan zaraa ta.abeer men laa.e Magar main to kahoon wo pahle mere saamne aa.e Vajood o sher ye donon define ho nahin sakte Kabhee mafhoom men hargiz ye kaa.in ho nahin sakte Hisaab-e-harf men aataa raha hai bas hasab un kaa Naheen ma.aloom iizad eezdaan ko bhee nasab un kaa Hai iizad eezdaan ik ramz jo be-ramz nisbat hai Miyaan ik haal hai ik haal jo be-haal-e-haalat hai Na jaane jabr hai haalat ki haalat jabr hai ya.anee Kisee bhee baat ke ma.anee jo hain un ke hain kya ma.anee Vajood ik jabr hai meraa adam auqaat hai meree Jo meree zaat hargiz bhee nahin wo zaat hai meree Main roz-o-shab nigaarish-kosh khud apne adam kaa hoon Main apna aadmee hargiz nahin lauh-o-qalam kaa hoon Hain kaDvaahaT men ye bheege hue lamhe ajab se kuch Saraasar be-hisaabaanaa saraasar be-sabab se kuch Saraabon ne saraabon par bahut baadal hain barsaa.e Sharaabon ne ma.aabad ke tamooz o ba.al nahlaa.e (yaqeenan qaafiya hai yaavaa-farmaa.ee kaa sar-chashma ''hain nahlaa.e'' ''hain barsaa.e'') Na jaane aariba kyuun aa.e kyuun musta.araba aa.e Muzir ke log to chhaane hee vaale the so wo chhaa.e Mire jad haashim-e-aalee ga.e gazza men dafnaa.e Main naaqe ko pilaa.oongaa mujhe vaan tak wo le jaa.e Lidoo lilmauti vabnoo lilhizaabi san kharaabaatee Vo mard-e-oos kahtaa hai haqeeqat hai khuraafaatee Ye zaalim teesraa paig ik aqaaneemee bidaayat hai Uloohee harzaa-farmaa.ee kaa sirr-e-toor-e-luknat hai Bhalaa hoorab kee jhaaDee kaa wo ramz-e-aatisheen kya tha Magar hoorab kee jhaaDee kya ye kis se kis kee nisbat hai Ye nisbat ke bahut se qaafiye hain hai gilaa is kaa Magar tujh ko to yaaraa! qaafiyon kee be-tarah lat hai Gumaan ye hai ki shaayad bahr se khaarij nahin hoon main Zaraa bhee haal ke aahang men haarij nahin hoon Tanaa-tan tan tanaa-tan tan tanaa-tan tan tanaa-tan tan Tanaa-tan tan nahin mehnat-kashon kaa tan na pairaahan Na pairaahan na puuree aadhee roTee ab raha saalan Ye saale kuch bhee khaane ko na paa.en gaaliyaan khaa.en Hai in kee be-hisee men to muqaddas-tar haraamee-pan Magar aahang meraa kho gaya shaayad kahaan jaane Koee mauj-e-... koi mauj-e-shumaal-e-jaavedaan jaane Shumaal-e-jaavedaan ke apne hee qisse the jo guzre Vo ho guzre to phir khud main ne bhee jaanaa wo ho guzre Shumaal-e-jaavedaan apna shumaal-e-jaavedaan-e-jaan Hai ab bhee apnee poonjee ik malaal-e-jaavedaan-e-jaan Naheen ma.aloom 'zayoon' ab tumhaaree umr kya hogee Yahee hai dil kaa mazmoon ab tumhaaree umr kya hogee Hamaare darmiyaan ab ek bejaa-tar zamaana hai Lab-e-tishna pe ik zahr-e-haqeeqat kaa fasaana hai Ajab fursat mayassar aa.ee hai ''dil jaan rishte'' ko Na dil ko aazmaanaa hai na jaan ko aazmaanaa hai Kaleed-e-kisht-zaar-e-khvaab bhee gum ho ga.ee aakhir Kahaan ab jaada-e-khurram men sar-sabzaana jaanaa hai Kahoon to kya kahoon meraa ye zakhm-e-jaavedaana hai Vahee dil kee haqeeqat jo kabhi jaan thee wo ab aakhir Fasaana dar fasaana dar fasaana dar fasaana hai Hamaaraa baahamee rishta jo haasil-tar tha rishton kaa Hamaaraa taur-e-be-zaaree bhee kitnaa vaalihaana hai Kisee kaa naam likkhaa hai miree saaree bayaazon par Main himmat kar raha hoon ya.anee ab us ko miTaanaa hai Ye ik shaam-e-azaab-e-be-sarokaana haalat hai Hue jaane kee haalat men hoon bas fursat hee fursat hai Naheen ma.aloom tum is waqt kis ma.aloom men hoge Na jaane kaun se ma.anee men kis mafhoom men hoge Main tha mafhoom naa-mafhoom men gum ho chukaa hoon main Main tha ma.aloom naa-maaloom men gum ho chukaa hoon main Naheen ma.aloom 'zaryoon' ab tumhaaree umr kya hogee Mire khud se guzarne ke zamaane se sivaa hogee Mire qaamat se ab qaamat tumhaaraa kuch fuzoon hogaa Miraa fardaa mire deeroz se bhee khush numoon hogaa Hisaab-e-maah-o-saal ab tak kabhi rakkhaa nahin main ne Kisee bhee fasl kaa ab tak maza chakkhaa nahin main ne Main apne aap men kab rah sakaa kab rah sakaa aakhir Kabhee ik pal ko bhee apne liye sochaa nahin main ne Hisaab-e-maah-o-saal o roz-o-shab wo sokhta-boodash Musalsal jaan-kanee ke haal men rakhtaa bhee to kaise Jise ye bhee na ho ma.aloom wo hai bhee to kyoon-kar hai Koee haalat dil-e-paamaal men rakhtaa bhee to kaise Koee nisbat bhee ab to zaat se baahar nahin meree Koee bistar nahin meraa koi chaadar nahin meree Ba-haal-e-naa-shitaa sad-zakhm-haa o khoon-haa khoodam Ba-har-dam shukaraan aamekhta ma.ajoon-haa khoodam Tumhen is baat se matlab hee kya aur aakhirash kyuun ho Kisee se bhee nahin mujh ko gila aur aakhirash kyuun ho Jo hai ik nang-e-hastee us ko tum kya jaan bhee loge Agar tum dekh lo mujh ko to kya pahchaan bhee loge Tumhen mujh se jo nafrat hai vahee to meree raahat hai Miree jo bhee aziyyat hai vahee to meree lazzat hai Ki aakhir is jahaan kaa ek nizaam-e-kaar hai aakhir Jazaa kaa aur sazaa kaa koi to hanjaar hai aakhir Main khud men jhenktaa hoon aur siine men bhaDaktaa hoon Mire andar jo hai ik shakhs main us men phaDaktaa hoon Hai meree zindagee ab roz-o-shab yak-majlis-e-gham-haa Azaa-haa marsiya-haa girya-haa aashob-e-maatam-haa Tumhaaree tarbiyat men meraa hissa kam raha kam-tar Zabaan meree tumhaare vaaste shaayad ki mushkil ho Zabaan apnee zabaan main tum ko aakhir kab sikhaa paayaa Azaab-e-sad-shamaatat aakhirash mujh par hee naazil ho Zabaan kaa kaam yuun bhee baat samjhaanaa nahin hota Samajh men koi bhee matlab kabhi aanaa nahin hota Kabhee khud tak bhee matlab koi pahunchaanaa nahin hota Gumaanon ke gumaan kee dam-ba-dam aashob-kaaree hai Bhalaa kya e'tibaaree aur kya naa-e'tibaaree hai Gumaan ye hai bhalaa men juz gumaan kya tha gumaanon men Sukhan hee kya fasaanon kaa dharaa kya hai fasaanon men Miraa kya tazkira aur vaaqa.ee kya tazkira meraa Main ik afsos tha afsos hoon guzre zamaanon men Hai shaayad dil miraa be-zakhm aur lab par nahin chhaale Mire siine men kab sozinda-tar daaghon ke hain thaale Magar dozakh pighal jaa.e jo mere saans apna le Tum apnee maam ke behad muraadee minnaton vaale Mire kuch bhee nahin kuch bhee nahin kuch bhee nahin baale Magar pahle kabhi tum se miraa kuch silsila to tha Gumaan men mere shaayad ik koi ghuncha khilaa to tha Vo meree jaavedaana be-duee kaa ik sila to tha So us ko ek abboo naam kaa ghoDaa milaa to tha Saaya-e-daamaan-e-rahmat chaahiye thoDaa mujhe Main na chhoDoon yaa nabee tum ne agar chhoDaa mujhe Iid ke din mustafaa se yuun lage kahne 'husain' Sabz joDaa do 'hasan' ko surkh do joDaa mujhe ''adab adab kutte tire kaan kaaToon 'zaryoon' ke byaah ke naan baaToon'' Taaron bhare jagar jagar khvaan baaToon ''aa jaa ree nindiyaa too aa kyuun na jaa 'zaryoon' ko aa ke sulaa kyuun na jaa'' Tumhaare byaah men shajara paDhaa jaanaa tha nausha vaastee doolhaa ''chaukee aangan men bichhee vaastee doolhaa ke liye'' Makke madeene ke paak musalle payambar ghar navaase Shaah-e-mardaan ameerul-mamineen hazrat-'alee' ke pote Hazrat imaam-'hasan' hazrat imaam-'husain' ke pote Hazrat imaam-alee-'naqee' ke pote Sayyad-'jaafar' saanee ke pote Sayyad abul-farah saidvaail-vaastee ke pote Meeraan sayyad-'alee'-buzurg ke pote Sayyad-'husain'-sharfuddeen shaah-vilaayat ke pote Qaazee sayyad-'ameer'-alee ke pote Deevaan sayyad-'haamid' ke pote Allaama sayyad-shafeeq-'hasan'-eliyaa ke pote Sayyad-'jaun'-eliyaa hasani-ul-husainee sapoot-jaah'' Magar naazir hamaaraa sokhta-sulb aakhiree nassaab ab marne hee vaalaa hai Bas ik pal haf sadee kaa faisla karne hee vaalaa hai Suno 'zaryoon' bas tum hee suno ya.anee faqat tum hee Vahee raahat men hai jo aam se hone ko apna le Kabhee koi bhee par ho koi 'bahman' yaar yaa 'zenoo' Tumhen bahkaa na paa.e aur bairoonee na kar Daale Main saaree zindagee ke dukh bhugat kar tum se kahtaa hoon Bahut dukh degee tum men fikr aur fan kee numoo mujh ko Tumhaare vaaste behad sahoolat chaahtaa hoon main Davaam-e-jahl o haal-e-istiraahat chaahtaa hoon main Na dekho kaash tum wo khvaab jo dekhaa kiyaa hoon main Vo saare khvaab the qassaab jo dekhaa kiyaa hoon main Kharaash-e-dil se tum be-rishta be-maqdoor hee Thahro Mire jahmeem-e-zaat-e-zaat se tum duur hee Thahro Koee 'zaryoon' koi bhee clerk aur koi kaarinda Koee bhee bank kaa afsar senator koi paavanda Har ik haivaan-e-sarkaaree ko TaTToo jaantaa hoon main So zaahir hai ise shai se ziyaada maantaa hoon main Tumhen ho sub.h-dam taufeeq bas akhbaar paDhne kee Tumhen ai kaash beemaaree na ho deevaar paDhne kee Ajab hai 'sartre' aur 'ressel' bhee akhbaar paDhte the Vo maaloomaat ke maidaan ke shauqeen booDhe the Naheen ma.aloom mujh ko aam shahree kaise hote hain Vo kaise apna banjar naam banjar-pan men bote hain Main ''urr'' se aaj tak ik aam shahree ho nahin paayaa Isee baa.is main hoon amboh kee lazzat se be-maaya Magar tum ik do-paaya raast qaamat ho ke dikhlaanaa Suno raa.e-dahinda bin hue tum baaz mat aanaa Faqat 'zaryoon' ho tum ya.anee apna saabiqaa chhoDo Faqat 'zaryoon' ho tum ya.anee apna laahiqaa chhoDo Magar main kaun jo chaahoon tumhaare baab men kuch bhee Bhalaa kyuun ho mire ehsaas ke asbaab men kuch bhee Tumhaaraa baap ya.anee main abas main ik abas-tar main Magar main ya.anee jaane kaun achchhaa main saraasar main Main kaasa-baaz o keena-saaz o kaasa-tan hoon kuttaa hoon Main ik nangeen-e-boodash hoon pa tum to sirr-e-mun.am ho Tumhaaraa baap roohul-quds tha tum ibn-e-maryam ho Ye qulqul teesraa paig ab to chauthaa ho gumaan ye hai Gumaan kaa mujh se koi khaas rishta ho gumaan ye hai Gumaan ye hai ki main jo jaa raha tha aa raha hoon main Magar main aa raha kab hoon piyaape jaa raha hoon main Ye chauthaa paig hai oon-hoon zalaalat kee ga.ee mujh se Zalaalat kee ga.ee mujh se khayaanat kee ga.ee mujh se Jozaamee ho ga.ee 'vazzaah' kee mahboob vaavailaa Magar is kaa gila kya jab nahin aayaa koi eilaa Suno meree kahaanee par miyaan meree kahaanee kya Main yaksar raa.igaanee hoon hisaab-e-raa.igaanee kya Bahut kuch tha kabhi shaayad par ab kuch bhee nahin hoon main Na apna ham-nafas hoon main na apna ham-nasheen hoon main Kabhee kee baat hai fariyaad meraa wo kabhi ya.anee Naheen is kaa koi matlab nahin is ke koi ma.anee Main apne shahr kaa sab se giraamee naam laDkaa tha Main be-hangaam laDkaa tha main sad-hangaam laDkaa tha Mire dam se ghazab hangaama rahtaa tha mohallon men Main hashr-aaghaaz laDkaa tha main hashr-anjaam laDkaa tha Mire hindoo musalmaan sab mujhe sar par biThaate the Unhee ke faiz se ma.anee mujhe ma.anee sikhaate the Sukhan bahtaa chalaa aataa hai be-baa.is ke honTon se Vo kuch kahtaa chalaa aataa hai be-baa.is ke honTon se Main ashraaf-e-kameena-kaar ko Thokar pe rakhtaa tha So main mehnat-kashon kee jootiyaan mimbar pe rakhtaa tha Main shaayad ab nahin hoon wo magar ab bhee vahee hoon main Ghazab hangaama-parvar kheera-sar ab bhee vahee hoon main Magar meraa tha ik taur aur bhee jo aur hee kuch tha Magar meraa tha ik daur aur bhee jo aur hee kuch tha Main apne shahr-e-ilm-o-fan kaa tha ik naujavaan kaahin Mire tilmeez-e-ilm-o-fan mire baabaa ke the ham-sin Miraa baabaa mujhe khaamosh aavaazen sunaataa tha Vo apne-aap men gum mujh ko pur-haalee sikhaataa tha Vo hai.at-daan wo aalim naaf-e-shab men chhat pe jaataa tha Rasad kaa rishta sayyaaron se rakhtaa tha nibhaataa tha Use khwaish thee shohrat kee na koi hirs-e-daulat thee BaDe se qutr kee ik doorbeen us kee zaroorat thee Miree maan kee tamannaaon kaa qaatil tha wo qallaama Miree maan meree mahbooba qayaamat kee haseena thee Sitam ye hai ye kahne se jhijaktaa tha wo fahhaama Thaa behad ishti.aal-angez bad-qismat o allaama Khalaf us ke khazaf aur be-nihaayat naa-khalaf nikle Ham us ke saare beTe intihaa.ee be-sharaf nikle Main us aalim-tareen-e-dahr kee fikrat kaa munkir tha Main fastaa.ee tha jaahil tha aur mantiq kaa maahir tha Par ab meree ye shohrat hai ki main bas ik sharaabee hoon Main apne doodmaan-e-ilm kee khaana-kharaabee hoon Sagaan-e-khook zaad-e-barzan o baazaar-e-be-maghzee Miree jaanib ab apne thobaDe shaahaana karte hain Zinaa-zaade miree izzat bhee gustaakhaana karte hain Kameene sharm bhee ab mujh se be-sharmaana karte the Mujhe is shaam hai apne labon par ik sukhan laanaa 'alee' darvesh tha tum us ko apna jadd na batlaanaa Vo sibtain-e-mohamaad, jin ko jaane kyuun bahut arfa.a Tum un kee duur kee nisbat se bhee yaksar mukar jaanaa Ki is nisbat se zahar o zakhm ko sahnaa zarooree hai Ajab ghairat se ghalteeda-ba-khoon rahnaa zarooree hai Vo shajra jo kanaana fahr ghaalib ka.ab marra se Qusai o haashim o sheba aboo-taalib tak aataa tha Vo ik andoh tha taareekh kaa andoh-e-sozinda Vo naamon kaa darakht-e-zard tha aur us kee shaakhon ko Kisee tannoor ke haizam kee khaakistar hee bannaa tha Use sho.ala-zada boodash kaa ik bistar hee bannaa tha Hamaaraa fakhr tha faqr aur daanish apnee poonjee thee Nasab-naamon ke ham ne kitne hee parcham lapeTe hain Mire ham-shahr 'zaryoon' ik fusoon hai nasl ham, donon Faqat aadam ke beTe hain faqat aadam ke beTe hain Main jab ausaan apne khone lagtaa hoon to hanstaa hoon Main tum ko yaad kar ke rone lagtaa hoon to hanstaa hoon Hamesha main khuda haafiz hamesha main khuda haafiz Khudaa haafiz Khudaa haafiz Nahin malum 'zaryun' ab tumhaari umr kya hogi Wo kin KHwabon se jaane aashna na-ashna hogi Tumhaare dil ke is duniya se kaise silsile honge Tumhein kaise guman honge tumhein kaise gile honge Tumhaari subh jaane kin KHayalon se nahati ho Tumhaari sham jaane kin malalon se nibhati ho Na jaane kaun doshiza tumhaari zindagi hogi Na jaane us ki kya bayastagi shaistagi hogi Use tum phone karte aur KHat likhte rahe hoge Na jaane tum ne kitni kam ghalat urdu likhi hogi Ye KHat likhna to daqyanus ki piDhi ka qissa hai Ye sinf-e-nasr hum na-baalighon ke fan ka hissa hai Wo hansti ho to shayad tum na rah pate ho haalon mein GaDha nanha sa paD jata ho shayad us ke galon mein Guman ye hai tumhaari bhi rasai na-rasai ho Wo aai ho tumhaare pas lekin aa na pai ho Wo shayad maide ki gand biryani na khati ho Wo nan-e-be-KHamir-e-maida kam-tar hi chabaati ho Wo doshiza bhi shayad dastanon ki ho dil-dada Use malum hoga 'zal' tha 'sohrab' ka dada Tahamtan yani 'rustam' tha girami 'sam' ka waris Girami 'sam' tha sulb-e-nar-e-'mani' ka KHush-zada (ye meri ek KHwahish hai jo mushkil hai) Wo 'najm'-afandi-e-marhum ko to jaanti hogi Wo nauhon ke adab ka tarz to pahchanti hogi Use kad hogi shayad un sabhi se jo lapaDi hon Na honge KHwab us ka jo gawayye aur khilaDi hon Hadaf honge tumhaara kaun tum kis ke hadaf hoge Na jaane waqt ki paikar mein tum kis taraf hoge Hai ran ye zindagi ek ran jo barpa lamha lamha hai Hamein is ran mein kuch bhi ho kisi jaanib to hona hai So hum bhi is nafas tak hain sipahi ek lashkar ke Hazaron sal se jite chale aae hain mar mar ke Shuhud ek fan hai aur meri adawat be-fanon se hai Meri paikar azal se Ye 'KHusro' 'mir' 'ghaalib' ka KHaraba bechta kya hai Hamara 'ghaalib'-e-azam tha chor aaqa-e-'bedil' ka So rizq-e-faKHr ab hum kha rahe hain 'mir'-e-bismil ka Sidhaarat bhi tha sharminda ki do-abe ka basi tha Tumhein malum hai urdu jo hai pali se nikli hai Wo goya us ki hi ek pur-numu Dali se nikli hai Ye kaDwahaT ki baaten hain miThas in ki na puchho tum Nam-e-lab ko tarasti hain so pyas in ki na puchho tum Ye ek do juron ki ek chuhl hai aur chuhl mein kya hai Awamunnas se puchho bhala al-kuhl mein kya hai Ye tan-o-tanz ki harza-sarai ho nahin sakti Ki meri jaan mere dil se rishta kho nahin sakti Nasha chaDhne laga hai aur chaDhna chahiye bhi tha Abas ka nirKH to is waqt baDhna chahiye bhi tha Ajab be-majra be-taur be-zarana haalat hai Wajud ek wahm hai aur wahm hi shayad haqiqat hai Gharaz jo haal tha wo nafs ke bazar hi ka tha Hai ze bazar mein to darmiyan 'zaryun' mein awwal To ye ibrafaniqi khelte harfon se the har pal To ye 'zaryun' jo hai kya ye aflatun hai koi Aman 'zaryun' hai 'zaryun' wo majun kyun hota Hain majunen mufid arwah ko majun yun hota Suno tafriq kaise ho bhala ashKHas o ashya mein Bahut janjal hain par ho yahan to ya mein aur ya mein Tumhaari jo hamasa hai bhala us ka to kya kahna Hai shayad mujh ko sari umr us ke sehr mein rahna Magar mere gharib ajdad ne bhi kuch kiya hoga Bahut tuchcha sahi un ka bhi koi majra hoga Ye hum jo hain hamari bhi to hogi koi nauTanki Hamara KHun bhi sach-much ka sehne par baha hoga Hai aaKHir zindagi KHun az-bun-e-naKHun bar-awar-tar Qayamat saneha matlab qayamat fajea parwar Nahin ho tum mere aur mera farda bhi nahin mera So main ne sahat-e-diroz mein Dala hai ab Dera Mere diroz mein zahr-e-halahal tegh-e-qatil hai Mere ghar ka wahi sarnam-tar hai jo bhi bismil hai Guzasht-e-waqt se paiman hai apna ajab sa kuch So ek mamul hai imran ke ghar ka ajab sa kuch 'hasan' nami hamare ghar mein ek 'suqraat' guzra hai Wo apni nafi se isbaat tak mashar ke pahuncha hai Ki KHun-e-raegan ke amr mein paDna nahin hum ko Wo sud-e-haal se yaksar ziyan-karana guzra hai Talab thi KHun ki qai ki use aur be-nihayat thi So fauran bint-e-ashash ka pilaya pi gaya hoga Wo ek lamhe ke andar sarmadiyyat ji gaya hoga Tumhaari arjumand ammi ko main bhula bahut din mein Main un ki rang ki taskin se nimTa bahut din mein Wahi to hain jinhon ne mujh ko paiham rang thukwaya Wo kis rag ka lahu hai jo miyan main ne nahin thuka Lahu aur thukna us ka hai karobar bhi mera Yahi hai sakh bhi meri yahi mear bhi mera Main wo hun jis ne apne KHun se mausam khilae hain Na-jaane waqt ke kitne hi aalam aazmae hain Main ek tariKH hun aur meri jaane kitni faslen hain Meri kitni hi faren hain meri kitni hi aslen hain Hawadis majra hi hum rahe hain ek zamane se Shadaed saneha hi hum rahe hain ek zamane se Hamesha se bapa ek jang hai hum us mein qaem hain Hamari jang KHair o shar ke bistar ki hai zaida Ye charKH-e-jabr ke dawwar-e-mumkin ki hai girwida LaDai ke liye maidan aur lashkar nahin lazim Sinan o gurz o shamshir o tabar KHanjar nahin lazim Bas ek ehsas lazim hai ki hum buadain hain donon Ki nafi-e-ain-e-ain o sar-ba-sar ziddain hain donon Luis-urbina ne meri ajab kuch gham-gusari ki Ba-sad dil danishi guzran apni mujh pe tari ki Bahut us ne pilai aur pine hi na di mujh ko Palak tak us ne marne ke liye jine na di mujh ko Main tere ishq mein ranjida hun han ab bhi kuch kuch hun Mujhe teri KHayanat ne ghazab majruh kar Dala Magar taish-e-shadidana ke baad aaKHir zamane mein Raza ki jawidana jabr ki naubat bhi aa pahunchi Mohabbat ek paspai hai pur-ahwal haalat ki Mohabbat apni yak-tauri mein dushman hai mohabbat ki SuKHan mal-e-mohabbat ki dukan-arai karta hai SuKHan sau tarah se ek ramz ki ruswai karta hai SuKHan bakwas hai bakwas jo Thahra hai fan mera Wo hai tabir ka aflas jo Thahra hai fan mera SuKHan yani labon ka fan suKHan-war yani ek pur-fan SuKHan-war izad achchha tha ki aadam ya phir ahriman Mazid aanki suKHan mein waqt hai waqt ab se ab yani Kuchh aisa hai ye main jo hun ye main apne siwa hun main So apne aap mein shayad nahin waqe hua hun main Jo hone mein ho wo har lamha apna ghair hota hai Ki hone ko to hone se ajab kuch bair hota hai Yunhi bas yunhi 'zenu' ne yakayak KHud-kushi kar li Ajab hiss-e-zarafat ke the malik ye rawaqi bhi Bidah yara azan baada ki dahqan parward aan-ra Ba sozad har mata-e-intimae dudmanan ra Ba-sozad in zamin-e-e'tibar-o-asmanan ra Ba-sozad jaan o dil raham bayasayad dil o jaan ra Dil o jaan aur aasaish ye ek kauni tamasKHur hai Humuq ki abqariyyat hai safahat ka tafakkur hai Humuq ki abqariyyat aur safahat ke tafakkur ne Hamein tazi-e-mohlat ke liye akwan baKHshe hain Aur aflatun-e-aqdas ne hamein aayan baKHshe hain Suno 'zaryun' tum to ain-e-ayan-e-haqiqat ho Nazar se dur manzar ka sar-o-saman-e-sarwat ho Hamari umr ka qissa hisab andoz-e-ani hai Zamani zad mein zan ki ek guman-e-lazimani hai Guman ye hai ki baqi hai baqa har aan fani hai Kahani sunne wale jo bhi hain wo KHud kahani hain Kahani kahne wala ek kahani ki kahani hai Piya pe ye gudazish ye guman aur ye gile kaise Sila-sozi to mera fan hai phir is ke sile kaise To main kya kah raha tha yani kya kuch sah raha tha main Aman han mez par ya mez par se bah raha tha main Ruko main be-sar-o-pa apne sar se bhag nikla hun Ila ya ayyuhal-abjad zara yani zara Thahro There is an absurd i in absurdity shayad Kahin apne siwa yani kahin apne siwa Thahro Tum is absurdity mein ek radif ek qafiya Thahro Radif o qafiya kya hain shikast-e-na-rawa kya hai Shikast-e-narawa ne mujh ko para para kar Dala Ana ko meri be-andaza-tar be-chaara kar Dala Main apne aap mein haara hun aur KHwarana haara hun Jigar-chaakana haara hun dil-afgarana haara hun Jise fan kahte aae hain wo hai KHun-e-jigar apna Magar KHun-e-jigar kya hai wo hai kattal-tar apna Koi KHun-e-jigar ka fan zara tabir mein lae Magar main to kahun wo pahle mere samne aae Wajud o sher ye donon define ho nahin sakte Kabhi mafhum mein hargiz ye kain ho nahin sakte Hisab-e-harf mein aata raha hai bas hasab un ka Nahin malum izad izdan ko bhi nasab un ka Hai izad izdan ek ramz jo be-ramz nisbat hai Miyan ek haal hai ek haal jo be-haal-e-haalat hai Na jaane jabr hai haalat ki haalat jabr hai yani Kisi bhi baat ke mani jo hain un ke hain kya mani Wajud ek jabr hai mera adam auqat hai meri Jo meri zat hargiz bhi nahin wo zat hai meri Main roz-o-shab nigarish-kosh KHud apne adam ka hun Main apna aadmi hargiz nahin lauh-o-qalam ka hun Hain kaDwahaT mein ye bhige hue lamhe ajab se kuch Sarasar be-hisabana sarasar be-sabab se kuch Sarabon ne sarabon par bahut baadal hain barsae Sharabon ne maabad ke tamuz o baal nahlae (yaqinan qafiya hai yawa-farmai ka sar-chashma Hain nahlae hain barsae) Na jaane aariba kyun aae kyun mustaraba aae Muzir ke log to chhane hi wale the so wo chhae Mere jad hashim-e-ali gae gazza mein dafnae Main naqe ko pilaunga mujhe wan tak wo le jae Lidu lilmauti wabnu lilhizabi san KHarabaati Wo mard-e-us kahta hai haqiqat hai KHurafati Ye zalim tisra paig ek aqanimi bidayat hai Uluhi harza-farmai ka sirr-e-tur-e-luknat hai Bhala hurab ki jhaDi ka wo ramz-e-atishin kya tha Magar hurab ki jhaDi kya ye kis se kis ki nisbat hai Ye nisbat ke bahut se qafiye hain hai gila is ka Magar tujh ko to yara! qafiyon ki be-tarah lat hai Guman ye hai ki shayad bahr se KHarij nahin hun main Zara bhi haal ke aahang mein haarij nahin hun Tana-tan tan tana-tan tan tana-tan tan tana-tan tan Tana-tan tan nahin mehnat-kashon ka tan na pairahan Na pairahan na puri aadhi roTi ab raha salan Ye sale kuch bhi khane ko na paen galiyan khaen Hai in ki be-hisi mein to muqaddas-tar harami-pan Magar aahang mera kho gaya shayad kahan jaane Koi mauj-e- koi mauj-e-shumal-e-jawedan jaane Shumal-e-jawedan ke apne hi qisse the jo guzre Wo ho guzre to phir KHud main ne bhi jaana wo ho guzre Shumal-e-jawedan apna shumal-e-jawedan-e-jaan Hai ab bhi apni punji ek malal-e-jawedan-e-jaan Nahin malum 'zayun' ab tumhaari umr kya hogi Yahi hai dil ka mazmun ab tumhaari umr kya hogi Hamare darmiyan ab ek beja-tar zamana hai Lab-e-tishna pe ek zahr-e-haqiqat ka fasana hai Ajab fursat mayassar aai hai dil jaan rishte ko Na dil ko aazmana hai na jaan ko aazmana hai Kalid-e-kisht-zar-e-KHwab bhi gum ho gai aaKHir Kahan ab jada-e-KHurram mein sar-sabzana jaana hai Kahun to kya kahun mera ye zaKHm-e-jawedana hai Wahi dil ki haqiqat jo kabhi jaan thi wo ab aaKHir Fasana dar fasana dar fasana dar fasana hai Hamara bahami rishta jo hasil-tar tha rishton ka Hamara taur-e-be-zari bhi kitna walihana hai Kisi ka nam likkha hai meri sari bayazon par Main himmat kar raha hun yani ab us ko miTana hai Ye ek sham-e-azab-e-be-sarokana haalat hai Hue jaane ki haalat mein hun bas fursat hi fursat hai Nahin malum tum is waqt kis malum mein hoge Na jaane kaun se mani mein kis mafhum mein hoge Main tha mafhum na-mafhum mein gum ho chuka hun main Main tha malum na-malum mein gum ho chuka hun main Nahin malum 'zaryun' ab tumhaari umr kya hogi Mere KHud se guzarne ke zamane se siwa hogi Mere qamat se ab qamat tumhaara kuch fuzun hoga Mera farda mere diroz se bhi KHush numun hoga Hisab-e-mah-o-sal ab tak kabhi rakkha nahin main ne Kisi bhi fasl ka ab tak maza chakkha nahin main ne Main apne aap mein kab rah saka kab rah saka aaKHir Kabhi ek pal ko bhi apne liye socha nahin main ne Hisab-e-mah-o-sal o roz-o-shab wo soKHta-budash Musalsal jaan-kani ke haal mein rakhta bhi to kaise Jise ye bhi na ho malum wo hai bhi to kyun-kar hai Koi haalat dil-e-pamal mein rakhta bhi to kaise Koi nisbat bhi ab to zat se bahar nahin meri Koi bistar nahin mera koi chadar nahin meri Ba-haal-e-na-shita sad-zaKHm-ha o KHun-ha KHudam Ba-har-dam shukaran aameKHta majun-ha KHudam Tumhein is baat se matlab hi kya aur aaKHirash kyun ho Kisi se bhi nahin mujh ko gila aur aaKHirash kyun ho Jo hai ek nang-e-hasti us ko tum kya jaan bhi loge Agar tum dekh lo mujh ko to kya pahchan bhi loge Tumhein mujh se jo nafrat hai wahi to meri rahat hai Meri jo bhi aziyyat hai wahi to meri lazzat hai Ki aaKHir is jahan ka ek nizam-e-kar hai aaKHir Jaza ka aur saza ka koi to hanjar hai aaKHir Main KHud mein jhenkta hun aur sine mein bhaDakta hun Mere andar jo hai ek shaKHs main us mein phaDakta hun Hai meri zindagi ab roz-o-shab yak-majlis-e-gham-ha Aza-ha marsiya-ha girya-ha aashob-e-matam-ha Tumhaari tarbiyat mein mera hissa kam raha kam-tar Zaban meri tumhaare waste shayad ki mushkil ho Zaban apni zaban main tum ko aaKHir kab sikha paya Azab-e-sad-shamatat aaKHirash mujh par hi nazil ho Zaban ka kaam yun bhi baat samjhana nahin hota Samajh mein koi bhi matlab kabhi aana nahin hota Kabhi KHud tak bhi matlab koi pahunchana nahin hota Gumanon ke guman ki dam-ba-dam aashob-kari hai Bhala kya e'tibari aur kya na-e'tibari hai Guman ye hai bhala mein juz guman kya tha gumanon mein SuKHan hi kya fasanon ka dhara kya hai fasanon mein Mera kya tazkira aur waqai kya tazkira mera Main ek afsos tha afsos hun guzre zamanon mein Hai shayad dil mera be-zaKHm aur lab par nahin chhaale Mere sine mein kab sozinda-tar daghon ke hain thaale Magar dozaKH pighal jae jo mere sans apna le Tum apni mam ke behad muradi minnaton wale Mere kuch bhi nahin kuch bhi nahin kuch bhi nahin baale Magar pahle kabhi tum se mera kuch silsila to tha Guman mein mere shayad ek koi ghuncha khila to tha Wo meri jawedana be-dui ka ek sila to tha So us ko ek abbu nam ka ghoDa mila to tha Saya-e-daman-e-rahmat chahiye thoDa mujhe Main na chhoDun ya nabi tum ne agar chhoDa mujhe Id ke din mustafa se yun lage kahne 'husain' Sabz joDa do 'hasan' ko surKH do joDa mujhe Adab adab kutte tere kan kaTun 'zaryun' ke byah ke nan baTun Taron bhare jagar jagar KHwan baTun Aa ja ri nindiya tu aa kyun na ja 'zaryun' ko aa ke sula kyun na ja Tumhaare byah mein shajara paDha jaana tha nausha wasti dulha Chauki aangan mein bichhi wasti dulha ke liye Makke madine ke pak musalle payambar ghar nawase Shah-e-mardan amirul-maminin hazrat-'ali' ke pote Hazrat imam-'hasan' hazrat imam-'husain' ke pote Hazrat imam-ali-'naqi' ke pote Sayyad-'jafar' sani ke pote Sayyad abul-farah saidwail-wasti ke pote Miran sayyad-'ali'-buzurg ke pote Sayyad-'husain'-sharfuddin shah-wilayat ke pote Qazi sayyad-'amir'-ali ke pote Diwan sayyad-'hamid' ke pote Allama sayyad-shafiq-'hasan'-eliya ke pote Sayyad-'jaun'-eliya hasani-ul-husaini saput-jah Magar nazir hamara soKHta-sulb aaKHiri nassab ab marne hi wala hai Bas ek pal haf sadi ka faisla karne hi wala hai Suno 'zaryun' bas tum hi suno yani faqat tum hi Wahi rahat mein hai jo aam se hone ko apna le Kabhi koi bhi par ho koi 'bahman' yar ya 'zenu' Tumhein bahka na pae aur bairuni na kar Dale Main sari zindagi ke dukh bhugat kar tum se kahta hun Bahut dukh degi tum mein fikr aur fan ki numu mujh ko Tumhaare waste behad sahulat chahta hun main Dawam-e-jahl o haal-e-istirahat chahta hun main Na dekho kash tum wo KHwab jo dekha kiya hun main Wo sare KHwab the qassab jo dekha kiya hun main KHarash-e-dil se tum be-rishta be-maqdur hi Thahro Mere jahmim-e-zat-e-zat se tum dur hi Thahro Koi 'zaryun' koi bhi clerk aur koi karinda Koi bhi bank ka afsar senator koi pawanda Har ek haiwan-e-sarkari ko TaTTu jaanta hun main So zahir hai ise shai se ziyaada manta hun main Tumhein ho subh-dam taufiq bas aKHbar paDhne ki Tumhein ai kash bimari na ho diwar paDhne ki Ajab hai 'sartre' aur 'ressel' bhi aKHbar paDhte the Wo malumat ke maidan ke shauqin buDhe the Nahin malum mujh ko aam shahri kaise hote hain Wo kaise apna banjar nam banjar-pan mein bote hain Main urr se aaj tak ek aam shahri ho nahin paya Isi bais main hun amboh ki lazzat se be-maya Magar tum ek do-paya rast qamat ho ke dikhlana Suno rae-dahinda bin hue tum baz mat aana Faqat 'zaryun' ho tum yani apna sabiqa chhoDo Faqat 'zaryun' ho tum yani apna lahiqa chhoDo Magar main kaun jo chahun tumhaare bab mein kuch bhi Bhala kyun ho mere ehsas ke asbab mein kuch bhi Tumhaara bap yani main abas main ek abas-tar main Magar main yani jaane kaun achchha main sarasar main Main kasa-baz o kina-saz o kasa-tan hun kutta hun Main ek nangin-e-budash hun pa tum to sirr-e-munam ho Tumhaara bap ruhul-quds tha tum ibn-e-maryam ho Ye qulqul tisra paig ab to chautha ho guman ye hai Guman ka mujh se koi KHas rishta ho guman ye hai Guman ye hai ki main jo ja raha tha aa raha hun main Magar main aa raha kab hun piyape ja raha hun main Ye chautha paig hai un-hun zalalat ki gai mujh se Zalalat ki gai mujh se KHayanat ki gai mujh se Jozami ho gai 'wazzah' ki mahbub wawaila Magar is ka gila kya jab nahin aaya koi eila Suno meri kahani par miyan meri kahani kya Main yaksar raigani hun hisab-e-raigani kya Bahut kuch tha kabhi shayad par ab kuch bhi nahin hun main Na apna ham-nafas hun main na apna ham-nashin hun main Kabhi ki baat hai fariyaad mera wo kabhi yani Nahin is ka koi matlab nahin is ke koi mani Main apne shahr ka sab se girami nam laDka tha Main be-hangam laDka tha main sad-hangam laDka tha Mere dam se ghazab hangama rehta tha mohallon mein Main hashr-aghaz laDka tha main hashr-anjam laDka tha Mere hindu musalman sab mujhe sar par biThate the Unhi ke faiz se mani mujhe mani sikhate the SuKHan bahta chala aata hai be-bais ke honTon se Wo kuch kahta chala aata hai be-bais ke honTon se Main ashraf-e-kamina-kar ko Thokar pe rakhta tha So main mehnat-kashon ki jutiyan mimbar pe rakhta tha Main shayad ab nahin hun wo magar ab bhi wahi hun main Ghazab hangama-parwar KHira-sar ab bhi wahi hun main Magar mera tha ek taur aur bhi jo aur hi kuch tha Magar mera tha ek daur aur bhi jo aur hi kuch tha Main apne shahr-e-ilm-o-fan ka tha ek naujawan kahin Mere tilmiz-e-ilm-o-fan mere baba ke the ham-sin Mera baba mujhe KHamosh aawazen sunata tha Wo apne-ap mein gum mujh ko pur-haali sikhata tha Wo haiat-dan wo aalim naf-e-shab mein chhat pe jata tha Rasad ka rishta sayyaron se rakhta tha nibhata tha Use KHwahish thi shohrat ki na koi hirs-e-daulat thi BaDe se qutr ki ek durbin us ki zarurat thi Meri man ki tamannaon ka qatil tha wo qallama Meri man meri mahbuba qayamat ki hasina thi Sitam ye hai ye kahne se jhijakta tha wo fahhama Tha behad ishtial-angez bad-qismat o allama KHalaf us ke KHazaf aur be-nihayat na-KHalaf nikle Hum us ke sare beTe intihai be-sharaf nikle Main us aalim-tarin-e-dahr ki fikrat ka munkir tha Main fastai tha jahil tha aur mantiq ka mahir tha Par ab meri ye shohrat hai ki main bas ek sharabi hun Main apne dudman-e-ilm ki KHana-KHarabi hun Sagan-e-KHuk zad-e-barzan o bazar-e-be-maghzi Meri jaanib ab apne thobaDe shahana karte hain Zina-zade meri izzat bhi gustaKHana karte hain Kamine sharm bhi ab mujh se be-sharmana karte the Mujhe is sham hai apne labon par ek suKHan lana 'ali' darwesh tha tum us ko apna jadd na batlana Wo sibtain-e-mohamad, jin ko jaane kyun bahut arfa Tum un ki dur ki nisbat se bhi yaksar mukar jaana Ki is nisbat se zahar o zaKHm ko sahna zaruri hai Ajab ghairat se ghaltida-ba-KHun rahna zaruri hai Wo shajra jo kanana fahr ghaalib kab marra se Qusai o hashim o sheba abu-talib tak aata tha Wo ek andoh tha tariKH ka andoh-e-sozinda Wo namon ka daraKHt-e-zard tha aur us ki shaKHon ko Kisi tannur ke haizam ki KHakistar hi banna tha Use shoala-zada budash ka ek bistar hi banna tha Hamara faKHr tha faqr aur danish apni punji thi Nasab-namon ke hum ne kitne hi parcham lapeTe hain Mere ham-shahr 'zaryun' ek fusun hai nasl ham, donon Faqat aadam ke beTe hain faqat aadam ke beTe hain Main jab ausan apne khone lagta hun to hansta hun Main tum ko yaad kar ke rone lagta hun to hansta hun Hamesha main KHuda hafiz hamesha main KHuda hafiz KHuda hafiz KHuda hafiz