haalat e haal ke sabab haalat e haal hi gaii

Haalat-e-haal ke sabab haalat-e-haal hee ga.ee Shauq men kuch nahin gaya shauq kee zindagee ga.ee Teraa firaaq jaan-e-jaan aish tha kya mire liye Ya.anee tire firaaq men khuub sharaab pee ga.ee Tere visaal ke liye apne kamaal ke liye Haalat-e-dil ki thee kharaab aur kharaab kee ga.ee Us kee umeed-e-naaz kaa ham se ye maan tha ki aap Umr guzaar deejiye umr guzaar dee ga.ee Ek hee haadsa to hai aur wo ye ki aaj tak Baat nahin kahee ga.ee baat nahin sunee ga.ee Ba.ad bhee tere jaan-e-jaan dil men raha ajab samaan Yaad rahi tiree yahaan phir tiree yaad bhee ga.ee Us ke badan ko dee numood ham ne sukhan men aur phir Us ke badan ke vaaste ek qabaa bhee see ga.ee Meenaa-ba-meenaa mai-ba-mai jaam-ba-jaam jam-ba-jam Naaf-piyaale kee tire yaad ajab sahee ga.ee Kahnee hai mujh ko ek baat aap se ya.anee aap se Aap ke shahr-e-vasl men lazzat-e-hijr bhee ga.ee Sehn-e-khayaal-e-yaar men kee na basar shab-e-firaaq Jab se wo chaandnaa gaya jab se wo chaandnee ga.ee