hai bikharne ko ye mahfil e rang o buu tum kahaan jaaoge ham kahaan jaaenge

Hai bikharne ko ye mahfil-e-rang-o-boo tum kahaan jaaoge ham kahaan jaa.enge Har taraf ho rahee hai yahee guftugoo tum kahaan jaaoge ham kahaan jaa.enge Har mataa-e-nafas nazr-e-aahang kee ham ko yaaraan havas thee bahut rang kee Gul-zameen se ubalne ko hai ab lahoo tum kahaan jaaoge ham kahaan jaa.enge Avval-e-shab kaa mahtaab bhee jaa chukaa sehn-e-mai-khaana se ab ufuq men kaheen Aakhir-e-shab hai khaalee hain jaam-o-suboo tum kahaan jaaoge ham kahaan jaa.enge Koee haasil na thaa aarzoo kaa magar saaneha ye hai ab aarzoo bhee naheen Vaqt kee is masaafat men be-aarzoo tum kahaan jaaoge ham kahaan jaa.enge Kis qadar duur se lauT kar aa.e hain yuun kaho umr barbaad kar aa.e hain Thaa saraab apna sarmaaya-e-justujoo tum kahaan jaaoge ham kahaan jaa.enge Ik junoon thaa ki aabaad ho shahr-e-jaan aur aabaad jab shahr-e-jaan ho gaya Hain ye sargoshiyaan dar-ba-dar koo-ba-koo tum kahaan jaaoge ham kahaan jaa.enge Dasht men raqs-e-shauq-e-bahaar ab kahaan baad-paimaa.ee-e-deevaana-vaar ab kahaan Bas guzarne ko hai mausam-e-haav-hoo tum kahaan jaaoge ham kahaan jaa.enge Ham hain rusvaa-kun-e-dillee-o-lucknow apnee kya zindagee apnee kya aabroo 'meer' dillee se nikle ga.e lucknow tum kahaan jaaoge ham kahaan jaa.enge