ham ji rahe hain koi bahaana kiye bagair

Ham jee rahe hain koi bahaana kiye baghair Us ke baghair us kee tamannaa kiye baghair Ambaar us kaa parda-e-hurmat banaa miyaan Deevaar tak nahin giree pardaa kiye baghair Yaaraan wo jo hai meraa maseehaa-e-jaan-o-dil Be-had aziiz hai mujhe achchhaa kiye baghair Main bistar-e-khayaal pe leTaa hoon us ke paas Sub.h-e-azal se koi taqaazaa kiye baghair Us kaa hai jo bhee Kuch hai miraa aur main magar Wo mujh ko chaahiye koi sauda kiye baghair Ye zindagee jo hai use ma.anaa bhee chaahiye Va.ada hamen qubool hai iifaa kiye baghair Ai qaatilon ke shahr bas itnee hee arz hai Main hoon na qatl koi tamaashaa kiye baghair Murshid ke jhuuT kee to sazaa be-hisaab hai Tum chhoDiyo na shahr ko sahraa kiye baghair Un aanganon men kitnaa sukoon o suroor thaa Aaraa.ish-e-nazar tiree parvaa kiye baghair Yaaraan khushaa ye roz o shab-e-dil ki ab hamen Sab Kuch hai khush-gavaar gavaaraa kiye baghair Girya-kunaan kee fard men apna nahin hai naam Ham girya-kun azal ke hain girya kiye baghair Aakhir hain kaun log jo bakhshe hee jaa.enge Taareekh ke haraam se tauba kiye baghair Wo sunnee bachcha kaun thaa jis kee jafaa ne 'jaun' Shii.aa banaa diyaa hamen shii.aa kiye baghair Ab tum kabhi na aaoge ya.anee kabhi kabhi Rukhsat karo mujhe koi va.ada kiye baghair