juz gumaan aur thaa hi kya meraa
— Jaun Eliya
Juz gumaan aur thaa hee kya meraa
Faqat ik meraa naam thaa meraa
Nik.hat-e-pairahan se us gul kee
Silsila be-sabaa raha meraa
Mujh ko khvaahish hee DhoonDne kee na thee
Mujh men khoyaa raha khuda meraa
Thuuk de Khoon jaan le wo agar
Aalam-e-tark-e-mudda.aa meraa
Jab tujhe meree chaah thee jaanaan
Bas vahee vaqt thaa kaDaa meraa
Koee mujh tak pahunch naheen paataa
Itnaa aasaan hai pataa meraa
Aa chukaa pesh wo muravvat se
Ab chaloon kaam ho chukaa meraa
Aaj main khud se ho gaya maayoos
Aaj ik yaar mar gaya meraa