kabhi jab muddaton ke baad us kaa saamnaa hogaa

Kabhi jab muddaton ke ba.ad us kaa saamnaa hogaa Sivaa.e paas aadaab-e-takalluf aur kya hogaa Yahaan wo kaun hai jo intikhaab-e-gham pe qaadir ho Jo mil jaa.e vahee gham doston kaa mudda.aa hogaa Naved-e-sar-khushee jab aa.egee us vaqt tak shaayad Hamen zahr-e-gham-e-hastee gavaaraa ho chukaa hogaa Saleeb-e-vaqt par main ne pukaaraa thaa mohabbat ko Miree awaaz jis ne bhee sunee hogee hansaa hogaa Abhee ik shor-e-haa-o-hoo sunaa hai saarbaanon ne Wo paagal qaafile kee zid men peechhe rah gaya hogaa Hamaare shauq ke aasooda-o-khush-haal hone tak Tumhaare aariz-o-gesoo kaa sauda ho chukaa hogaa Navaa.en nik.haten aasooda chehre dil-nasheen rishte Magar ik shakhs is maahaul men kya sochtaa hogaa Hansee aatee hai mujh ko maslahat ke in taqaazon par Ki ab ik ajnabee ban kar use pahchaannaa hogaa Daleelon se davaa kaa kaam lenaa sakht mushkil hai Magar is gham kee khaatir ye hunar bhee seekhnaa hogaa Wo munkir hai to phir shaayad har ik maktoob-e-shauq us ne Sar-angusht-e-hinaa.ee se khalaaon men likhaa hogaa Hai nisf-e-shab wo deevaana abhee tak ghar nahin aayaa Kisee se chaandnee raaton kaa qissa chhiD gaya hogaa Sabaa shikvaa hai mujh ko un dareechon se dareechon se Dareechon men to deemak ke sivaa ab aur kya hogaa