sar hi ab phodiye nadaamat men

Sar hee ab phoDiye nadaamat men Niind aane lagee hai furqat men Hain daleelen tire khilaaf magar Sochtaa hoon tiree himaayat men Ruuh ne ishq kaa fareb diyaa Jism ko jism kee adaavat men Ab faqat aadaton kee varzish hai Ruuh shaamil nahin shikaayat men Ishq ko darmiyaan na laao ki main Cheekhtaa hoon badan kee usrat men Ye Kuch aasaan to nahin hai ki ham RooThte ab bhee hain muravvat men Wo jo ta.ameer hone vaalee thee Lag ga.ee aag us imaarat men Zindagee kis tarah basar hogee Dil nahin lag raha mohabbat men Haasil-e-kun hai ye jahaan-e-kharaab Yahee mumkin thaa itnee ujlat men Phir banaayaa khuda ne aadam ko Apnee soorat pe aisee soorat men Aur phir aadmee ne ghaur kiyaa Chhipkilee kee lateef san.at men Ai khuda jo kaheen nahin maujood Kya likhaa hai hamaaree qismat men