sharmindagii hai ham ko bahut ham mile tumhen

Sharmindagee hai ham ko bahut ham mile tumhen Tum sar-ba-sar khushee the magar gham mile tumhen Main apne aap men na milaa is kaa gham naheen Gham to ye hai ki tum bhee bahut kam mile tumhen Hai jo hamaaraa ek hisaab us hisaab se Aatee hai ham ko sharm ki paiham mile tumhen Tum ko jahaan-e-shauq-o-tamannaa men kya milaa Ham bhee mile to darham o barham mile tumhen Ab apne taur hee men naheen tum so kaash ki Khud men khud apna taur koee dam mile tumhen Is shahr-e-heela-joo men jo mahram mile mujhe Fariyaad jaan-e-jaan vahee mahram mile tumhen Detaa hoon tum ko khushki-e-mizhgaan kee main duaa Matlab ye hai ki daaman-e-pur-nam mile tumhen Main un men aaj tak kabhee paayaa naheen gaya Jaanaan jo mere shauq ke aalam mile tumhen Tum ne hamaare dil men bahut din safar kiyaa Sharminda hain ki us men bahut kham mile tumhen Yuun ho ki aur hee koee havvaa mile mujhe Ho yuun ki aur hee koee aadam mile tumhen