thiik hai khud ko ham badalte hain
— Jaun Eliya
Thiik hai khud ko ham badalte hain
Shukriya mashvarat kaa chalte hain
Ho raha hoon main kis tarah barbaad
Dekhne vaale haath malte hain
Hai wo jaan ab har ek mahfil kee
Ham bhee ab ghar se kam nikalte hain
Kya takalluf karen ye kahne men
Jo bhee khush hai ham us se jalte hain
Hai use duur kaa safar dar-pesh
Ham sambhaale naheen sambhalte hain
Tum bano rang tum bano khushboo
Ham to apne sukhan men Dhalte hain
Main usee tarah to bahaltaa hoon
Aur sab jis tarah bahalte hain
Hai ajab faisle kaa sahraa bhee
Chal na paDiye to paanv jalte hain