tumhaaraa hijr manaa luun agar ijaazat ho
— Jaun Eliya
Tumhaaraa hijr manaa luun agar ijaazat ho
Main dil kisee se lagaa luun agar ijaazat ho
Tumhaare baa'd bhalaa kya hain va.ada-o-paimaan
Bas apna vaqt ganvaa luun agar ijaazat ho
Tumhaare hijr kee shab-haa-e-kaar men jaanaan
Koee charaagh jalaa luun agar ijaazat ho
Junoon vahee hai vahee main magar hai shahr nayaa
Yahaan bhee shor machaa luun agar ijaazat ho
Kise hai khvaahish-e-marham-garee magar phir bhee
Main apne zakhm dikhaa luun agar ijaazat ho
Tumhaaree yaad men jiine kee aarzoo hai abhee
Kuch apna haal sambhaaloon agar ijaazat ho