tuu bhi chup hai main bhi chup hoon ye kaisii tanhaaii hai

Too bhee chup hai main bhee chup hoon ye kaisee tanhaa.ee hai Tere saath tiree yaad aa.ee kya too sach-much aa.ee hai Shaayad wo din pahlaa din thaa palken bojhal hone kaa Mujh ko dekhte hee jab us kee Angdhaai sharmaa.ee hai Us din pahlee baar huaa thaa mujh ko rifaaqat kaa ehsaas Jab us ke malboos kee khushboo ghar pahunchaane aa.ee hai Husn se arz-e-shauq na karnaa husn ko zak pahunchaanaa hai Ham ne arz-e-shauq na kar ke husn ko zak pahunchaa.ee hai Ham ko aur to Kuch nahin soojhaa albatta us ke dil men Soz-e-raqaabat paidaa kar ke us kee niind uDaa.ee hai Ham donon mil kar bhee dilon kee tanhaa.ee men bhaTkenge Paagal Kuch to soch ye too ne kaisee shakl banaa.ee hai Ishq-e-pechaan kee sandal par jaane kis din bel chaDhe Kyaaree men paanee Thahraa hai deevaaron par kaa.ee hai Husn ke jaane kitne chehre husn ke jaane kitne naam Ishq kaa pesha husn-parastee ishq baDaa harjaa.ee hai Aaj bahut din baa'd main apne kamre tak aa niklaa thaa Juun hee darvaaza kholaa hai us kee khushboo aa.ee hai Ek to itnaa habs hai phir main saansen roke baiThaa hoon Veeraanee ne jhaaDoo de ke ghar men dhuul uDaa.ee hai