ye gam kya dil ki aadat hai nahin to
— Jaun Eliya
Ye gham kya dil kee 'aadat hai naheen to
Kisee se Kuch shikaayat hai naheen to
Kisee ke bin kisee kee yaad ke bin
Jiye jaane kee himmat hai naheen to
Hai wo ik khvaab-e-be-ta.abeer us ko
Bhulaa dene kee neeyat hai naheen to
Kisee soorat bhee dil lagtaa naheen haan
To Kuch din se ye haalat hai naheen to
Tire is haal par hai sab ko hairat
Tujhe bhee is pe hairat hai naheen to
Ham-aahangee naheen Dunya se teree
Tujhe is par nadaamat hai naheen to
Huaa jo Kuch yahee maqsoom thaa kya
Yahee saaree hikaayat hai naheen to
Aziyyat-naak ummeedon se tujh ko
Amaan paane kee hasrat hai naheen to
Too rahtaa hai khayaal-o-khvaab men gum
To is kee vaj.h fursat hai naheen to
Sabab jo is judaa.ee kaa banaa hai
Wo mujh se khoob-soorat hai naheen to