zindagii kya hai ik kahaanii hai
— Jaun Eliya
Zindagee kya hai ik kahaanee hai
Ye kahaanee naheen sunaanee hai
Hai khuda bhee ajiib ya.anee jo
Na zameenee na aasmaanee hai
Hai mire shauq-e-vasl ko ye gila
Us kaa pahloo saraa-e-faanee hai
Apnee taameer-e-jaan-o-dil ke liye
Apnee buniyaad ham ko Dhaanee hai
Ye hai lamhon kaa ek shahr-e-azal
Yaan kee har baat naa-gahaanee hai
Chaliye ai jaan-e-shaam aaj tumhen
Sham.a ik qabr par jalaanee hai
Rang kee apnee baat hai varna
Aakhirash Khoon bhee to paanee hai
Ik abas kaa vajood hai jis se
Zindagee ko muraad paanee hai
Shaam hai aur sahn men dil ke
Ik ajab huzn-e-aasmaanee hai