Abhi zamiir men thodii sii jaan baaqii hai
— Javed Akhtar
Abhee zameer men thoDee see jaan baaqee hai
Abhee hamaaraa koi imtihaan baaqee hai
Hamaare ghar ko to ujDe hue zamaana huaa
Magar sunaa hai abhee wo makaan baaqee hai
Hamaaree un se jo thee guftugoo wo khatm huee
Magar sukoot saa Kuch darmiyaan baaqee hai
Hamaare zehn kee bastee men aag aisi lagee
Ki jo thaa khaak huaa ik dukaan baaqee hai
Wo zakhm bhar gaya arsa huaa magar ab tak
Zaraa saa dard zaraa saa nishaan baaqee hai
Zaraa see baat jo phailee to daastaan banee
Wo baat khatm huee daastaan baaqee hai
Ab aayaa tiir chalaane kaa fan to kya aayaa
Hamaare haath men khaalee kamaan baaqee hai