dast bardaar agar aap gazab se ho jaaen
— Javed Akhtar
Dast-bardaar agar aap ghazab se ho jaa.en
Har sitam bhuul ke ham aap ke ab se ho jaa.en
Chaudhveen shab hai to khiDkee ke giraa do parde
Kaun jaane ki wo naaraaz hee shab se ho jaa.en
Ek khushboo kee tarah phailte hain mahfil men
Aise alfaaz adaa jo tire lab se ho jaa.en
Na koi ishq hai baaqee na koi parcham hai
Log deevaane bhalaa kis ke sabab se ho jaa.en
Baandh lo haath ki phailen na kisee ke aage
See lo ye lab ki kaheen wo na talab se ho jaa.en
Baat to chheD mire dil koi qissa to sunaa
Kya ajab un ke bhee jazbaat ajab se ho jaa.en