phirte hain kab se dar ba dar ab is nagar ab us nagar ik duusre ke ham safar main aur mirii aavaargii

Phirte hain kab se dar-ba-dar ab is nagar ab us nagar ik doosre ke ham-safar main aur miree aavaargee Naa-aashnaa har rah-guzar naa-mehrbaan har ik nazar jaa.en to ab jaa.en kidhar main aur miree aavaargee Ham bhee kabhee aabaad the aise kahaan barbaad the be-fikr the aazaad the masroor the dil-shaad the Wo chaal aisee chal gaya ham bujh ga.e dil jal gaya nikle jalaa ke apna ghar main aur miree aavaargee Jiinaa bahut aasaan thaa ik shakhs kaa ehsaan thaa ham ko bhee ik armaan thaa jo khvaab kaa saamaan thaa Ab khvaab hai nai aarzoo armaan hai nai justujoo yuun bhee chalo khush hain magar main aur miree aavaargee Wo maah-vash wo maah-roo wo maah-kaam-e-hoo-ba-hoo thiin jis kee baaten koo-ba-koo us se ajab thee guftugoo Phir yuun huaa wo kho ga.ee to mujh ko zid see ho ga.ee laa.enge us ko DhoonD kar main aur miree aavaargee Ye dil hee thaa jo sah gaya wo baat aisee kah gaya kahne ko phir kya rah gaya ashkon kaa Dariya bah gaya Jab kah ke wo dilbar gaya tere liye main mar gaya rote hain us ko raat bhar main aur miree aavaargee Ab gham uThaa.en kis liye aansoo bahaa.en kis liye ye dil jalaa.en kis liye yuun jaan ganvaa.en kis liye Pesha na ho jis kaa sitam DhoonDenge ab aisa sanam honge kaheen to kaargar main aur miree aavaargee Aasaar hain sab khoT ke imkaan hain sab choT ke ghar band hain sab goT ke ab khatm hain sab ToTke Qismat kaa sab ye pher hai andher hai andher hai aise hue hain be-asar main aur miree aavaargee Jab hamdam-o-hamraaz thaa tab aur hee andaaz thaa ab soz hai tab saaz thaa ab sharm hai tab naaz thaa Ab mujh se ho to ho bhee kya hai saath wo to wo bhee kya ik be-hunar ik be-samar main aur miree aavaargee