shukr hai khairiyat se hoon saahab
— Javed Akhtar
Shukr hai khairiyat se hoon saahab
Aap se aur kya kahoon saahab
Ab samajhne lagaa hoon sood-o-ziyaan
Ab kahaan mujh men wo junoon saahab
Zillat-e-zeest yaa shikast-e-zameer
Ye sahoon main ki wo sahoon saahab
Ham tumhen yaad karte ro lete
Do-ghaDee miltaa jo sukoon saahab
Shaam bhee Dhal rahi hai ghar bhee hai duur
Kitnee der aur main rukoon saahab
Ab jhukoongaa to Toot jaa.oongaa
Kaise ab aur main jhukoon saahab
Kuch rivaayaat kee gavaahee par
Kitnaa jurmaana main bharoon saahab