zaraa mausam to badlaa hai magar pedon ki shaakhon par nae patton ke aane men Abhi Kuch din lagenge

Zaraa mausam to badlaa hai magar peDon kee shaakhon par na.e patton ke aane men abhee Kuch din lagenge Bahut se zard chehron par ghubaar-e-gham hai kam be-shak par un ko muskuraane men abhee Kuch din lagenge Kabhi ham ko yaqeen thaa zo.am thaa Dunya hamaaree jo mukhaalif hai to ho jaa.e magar tum mehrbaan ho Hamen ye baat vaise yaad to ab kya hai lekin haan ise yaksar bhulaane men abhee Kuch din lagenge Jahaan itne masaa.ib hon jahaan itnee pareshaanee kisee kaa bevafaa honaa hai koi saaneha kya Bahut ma.aqool hai ye baat lekin is haqeeqat tak dil-e-naadaan ko laane men abhee Kuch din lagenge Koi TuuTe hue sheeshe liye afsurda-o-maghmoom kab tak yuun guzaare be-talab be-aarzoo din To in khawabon kee kirchen ham ne palkon se jhaTak diin par na.e armaan sajaane men abhee Kuch din lagenge Tavahhum kee siyah shab ko kiran se chaak kar ke aagahee har ek aangan men nayaa sooraj utaare Magar afsos ye sach hai wo shab thee aur ye suraj hai ye sab ko maan jaane men abhee Kuch din lagenge Puraanee manzilon kaa shauq to kis ko hai baaqee ab na.ee hain manzilen hain sab ke dil men jin ke armaan Banaa lenaa na.ee manzil na thaa mushkil magar ai dil na.e raste banaane men abhee Kuch din lagenge Andhere Dhal ga.e raushan hue manzar zameen jaagee falak jaagaa to jaise jaag uTThee zindagaanee Magar Kuch yaad-e-maazee oDh ke so.e hue logon ko lagtaa hai jagaane men abhee Kuch din lagenge