aankhon kaa thaa qusuur na dil kaa qusuur thaa

Aankhon kaa thaa qusoor na dil kaa qusoor thaa Aayaa jo mere saamne meraa ghuroor thaa Taareek misl-e-aah jo aankhon kaa nuur thaa Kya sub.h hee se shaam-e-balaa kaa zuhoor thaa Wo the na mujh se duur na main un se duur thaa Aataa na thaa nazar to nazar kaa qusoor thaa Har vaqt ik khumaar thaa har dam suroor thaa Botal baghal men thee ki dil-e-naa-suboor thaa Koee to dardmand-e-dil-e-naa-suboor thaa Maanaa ki tum na the koee tum saa zaroor thaa Lagte hee Thes Toot gaya saaz-e-aarzoo Milte hee aankh sheesha-e-dil chuur chuur thaa Aisa kahaan bahaar men rangeeniyon kaa josh Shaamil kisee kaa khoon-e-tamannaa zaroor thaa Saaqee kee chashm-e-mast kaa kya keejiye bayaan Itnaa suroor thaa ki mujhe bhee suroor thaa PalTee jo raaste hee se ai aah-e-naa-muraad Ye to bataa ki baab-e-asar kitnee duur thaa Jis dil ko tum ne lutf se apna banaa liyaa Us dil men ik chhupaa huaa nashtar zaroor thaa Us chashm-e-mai-farosh se koee na bach sakaa Sab ko ba-qadr-e-hausla-e-dil suroor thaa Dekhaa thaa kal 'jigar' ko sar-e-raah-e-mai-kada Is darja pee gaya thaa ki nashshe men chuur thaa