aankhon men bas ke dil men samaa kar chale gae

Aankhon men bas ke dil men samaa kar chale ga.e Khvaabeeda zindagee thee jagaa kar chale ga.e Husn-e-azal kee shaan dikhaa kar chale ga.e Ik vaaqi.a saa yaad dilaa kar chale ga.e Chehre tak aasteen wo laa kar chale ga.e Kya raaz thaa ki jis ko chhupaa kar chale ga.e Rag rag men is tarah wo samaa kar chale ga.e Jaise mujhee ko mujh se churaa kar chale ga.e Meree hayaat-e-ishq ko de kar junoon-e-shauq Mujh ko tamaam hosh banaa kar chale ga.e Samjhaa ke pastiyaan mire auj-e-kamaal kee Apnee bulandiyaan wo dikhaa kar chale ga.e Apne farogh-e-husn kee dikhlaa ke vus.aten Mere hudood-e-shauq baDhaa kar chale ga.e Har shai ko meree khaatir-e-naashaad ke liye Aa.eena-e-jamaal banaa kar chale ga.e Aa.e the dil kee pyaas bujhaane ke vaaste Ik aag see wo aur lagaa kar chale ga.e Aa.e the chashm-e-shauq kee hasrat nikaalne Sar-taa-qadam nigaah banaa kar chale ga.e Ab kaarobaar-e-ishq se fursat mujhe kahaan Kaunain kaa wo dard baDhaa kar chale ga.e Shukr-e-karam ke saath ye shikva bhee ho qubool Apna saa kyuun na mujh ko banaa kar chale ga.e Lab thartharaa ke rah ga.e lekin wo ai 'jigar' Jaate hue nigaah milaa kar chale ga.e