ab to ye bhi nahin raha ehsaas
— Jigar Moradabadi
Ab to ye bhee naheen raha ehsaas
Dard hota hai yaa naheen hota
Ishq jab tak na kar chuke rusvaa
Aadmee kaam kaa naheen hota
Toot paDtaa hai daf.atan jo ishq
Besh-tar der-paa naheen hota
Wo bhee hota hai ek vaqt ki jab
Maa-sivaa maa-sivaa naheen hota
Haa.e kya ho gaya tabee.at ko
Gham bhee raahat-fazaa naheen hota
Dil hamaaraa hai yaa tumhaaraa hai
Ham se ye faisla naheen hota
Jis pe teree nazar naheen hotee
Us kee jaanib khuda naheen hota
Main ki be-zaar umr bhar ke liye
Dil ki dam-bhar judaa naheen hota
Wo hamaare qareeb hote hain
Jab hamaaraa pataa naheen hota
Dil ko kya kya sukoon hota hai
Jab koee aasraa naheen hota
Ho ke ik baar saamnaa un se
Phir kabhee saamnaa naheen hota