agar na zohra jabiinon ke darmiyaan guzre

Agar na zohra-jabeenon ke darmiyaan guzre To phir ye kaise kaTe zindagee kahaan guzre Jo tere aariz o gesoo ke darmiyaan guzre Kabhi kabhi vahee lamhe balaa-e-jaan guzre Mujhe ye vahm raha muddaton ki jur.at-e-shauq Kaheen na khaatir-e-maasoom par giraan guzre Har ik maqaam-e-mohabbat bahut hee dilkash thaa Magar ham ahl-e-mohabbat kashaan kashaan guzre Junoon ke sakht maraahil bhee teree yaad ke saath Haseen haseen nazar aa.e javaan javaan guzre Miree nazar se tiree justujoo ke sadqe men Ye ik jahaan hee nahin sainkaDon jahaan guzre Hujoom-e-jalva men parvaaz-e-shauq kya kahnaa Ki jaise ruuh sitaaron ke darmiyaan guzre Khataa-muaaf zamaane se bad-gumaan ho kar Tiree wafa pe bhee kya kya hamen gumaan guzre Mujhe thaa shikva-e-hijraan ki ye huaa mahsoos Mire qareeb se ho kar wo naa-gahaan guzre Rah-e-wafa men ik aisa maqaam bhee aayaa Ki ham khud apnee taraf se bhee bad-gumaan guzre Khuloos jis men ho shaamil wo daur-e-ishq-o-havas Na raa.egaan kabhi guzraa na raa.egaan guzre Usee ko kahte hain jannat usee ko dozakh bhee Wo zindagee jo haseenon ke darmiyaan guzre Bahut haseen manaazir bhee husn-e-fitrat ke Na jaane aaj tabee.at pe kyuun giraan guzre Wo jin ke saa.e se bhee bijliyaan laraztee thiin Miree nazar se Kuch aise bhee aashiyaan guzre Miraa to farz chaman-bandi-e-jahaan hai faqat Miree balaa se bahaar aa.e yaa khizaan guzre Kahaan kaa husn ki khud ishq ko khabar na huee Rah-e-talab men Kuch aise bhee imtihaan guzre Bharee bahaar men taaraaji-e-chaman mat poochh Khuda kare na phir aankhon se wo samaan guzre Koi na dekh sakaa jin ko wo dilon ke sivaa Muaamlaat Kuch aise bhee darmiyaan guzre Kabhi kabhi to isee ek musht-e-khaak ke gird Tavaaf karte hue haft aasmaan guzre Bahut haseen sahee sohbaten gulon kee magar Wo zindagee hai jo kaanTon ke darmiyaan guzre Abhee se tujh ko bahut naagavaar hain hamdam Wo haadsaat jo ab tak ravaan-davaan guzre Jinhen ki deeda-e-shaa.ir hee dekh saktaa hai Wo inqilaab tire saamne kahaan guzre Bahut aziiz hai mujh ko unhen kya yaad 'jigar' Wo haadsaat-e-mohabbat jo naa-gahaan guzre