ai husn e yaar sharm ye kya inqalaab hai

Ai husn-e-yaar sharm ye kya inqalaab hai Tujh se ziyaada dard tiraa kaamyaab hai Aashiq kee be-dilee kaa taghaaful nahin javaab Us kaa bas ek josh-e-mohabbat javaab hai Teree inaayaten ki nahin nazr-e-jaan qubool Teree navaazishen ki zamaana kharaab hai Ai husn apnee hausla-afzaa.iyaan to dekh Maanaa ki chashm-e-shauq bahut be-hijaab hai Main ishq-e-be-niyaaz hoon tum husn-e-be-panaah Meraa javaab hai na tumhaaraa javaab hai Mai-khaana hai usee kaa ye dunya usee kee hai Jis tishna-lab ke haath men jaam-e-sharaab hai Us se dil-e-tabaah kee roodaad kya kahoon Jo ye na sun sake ki zamaana kharaab hai Ai mohtasib na phenk mire mohtasib na phenk Zaalim sharaab hai are zaalim sharaab hai Apne hudood se na baDhe koi ishq men Jo zarra jis jagah hai vaheen aaftaab hai Wo laakh saamne hon magar is kaa kya ilaaj Dil maantaa nahin ki nazar kaamyaab hai Meree nigaah-e-shauq bhee kuch kam nahin magar Phir bhee tiraa shabaab tiraa hee shabaab hai Maanoos-e-aitbaar-e-karam kyuun kiyaa mujhe Ab har khataa-e-shauq isee kaa javaab hai Main us kaa aa.eena hoon wo hai meraa aa.eena Meree nazar se us kee nazar kaamyaab hai Tanhaa.ee-e-firaaq ke qurbaan jaa.iye Main hoon khayaal-e-yaar hai chashm-e-pur-aab hai Sarmaaya-e-firaaq 'jigar' aah kuch na poochh Ab jaan hai so apne liye khud azaab hai