dil gaya raunaq e hayaat gaii

Dil gaya raunaq-e-hayaat ga.ee Gham gaya saaree kaa.enaat ga.ee Dil dhaDakte hee phir ga.ee wo nazar Lab tak aa.ee na thee ki baat ga.ee Din kaa kya zikr teera-bakhton men Ek raat aa.ee ek raat ga.ee Teree baaton se aaj to vaa.iz Wo jo thee khvaahish-e-najaat ga.ee Un ke bahlaa.e bhee na bahlaa dil Raa.egaan sa.ee-e-iltifaat ga.ee Marg-e-aashiq to Kuch naheen lekin Ik maseehaa-nafas kee baat ga.ee Ab junoon aap hai garebaan-geer Ab wo rasm-e-takallufaat ga.ee Ham ne bhee vaz-e-gham badal Daalee Jab se wo tarz-e-iltifaat ga.ee Tark-e-ulfat bahut bajaa naaseh Lekin us tak agar ye baat ga.ee Haan maze luuT le javaanee ke Phir na aa.egee ye jo raat ga.ee Haan ye sarshaariyaan javaanee kee Aankh jhapkee hee thee ki raat ga.ee Jalva-e-zaat ai ma.aaz-allaah Taab-e-aa.eena-e-sifaat ga.ee Naheen miltaa mizaaj-e-dil ham se Ghaaliban duur tak ye baat ga.ee Qaid-e-hastee se kab najaat 'jigar' Maut aa.ee agar hayaat ga.ee