dil men kisi ke raah kiye jaa raha hoon main

Dil men kisee ke raah kiye jaa raha hoon main Kitnaa haseen gunaah kiye jaa raha hoon main Dunya-e-dil tabaah kiye jaa raha hoon main Sarf-e-nigaah-o-aah kiye jaa raha hoon main Fard-e-amal siyaah kiye jaa raha hoon main Rahmat ko be-panaah kiye jaa raha hoon main Aisee bhee ik nigaah kiye jaa raha hoon main Zarron ko mehr-o-maah kiye jaa raha hoon main Mujh se lage hain ishq kee azmat ko chaar chaand Khud husn ko gavaah kiye jaa raha hoon main Daftar hai ek maani-e-be-lafz-o-saut kaa Saada see jo nigaah kiye jaa raha hoon main Aage qadam baDhaa.en jinhen soojhtaa nahin Raushan charaagh-e-raah kiye jaa raha hoon main Maasoomi-e-jamaal ko bhee jin pe rashk hai Aise bhee Kuch gunaah kiye jaa raha hoon main Tanqeed-e-husn maslahat-e-khaas-e-ishq hai Ye jurm gaah gaah kiye jaa raha hoon main UThtee nahin hai aankh magar us ke roo-ba-roo Naadeeda ik nigaah kiye jaa raha hoon main Gulshan-parast hoon mujhe gul hee nahin aziiz KaanTon se bhee nibaah kiye jaa raha hoon main Yuun zindagee guzaar raha hoon tire baghair Jaise koi gunaah kiye jaa raha hoon main Mujh se adaa huaa hai 'jigar' justujoo kaa haq Har zarre ko gavaah kiye jaa raha hoon main