ishq ko be naqaab honaa thaa

Ishq ko be-naqaab honaa thaa Aap apna javaab honaa thaa Mast-e-jaam-e-sharaab honaa thaa Be-khud-e-iztiraab honaa thaa Teree aankhon kaa Kuch qusoor nahin Haan mujhee ko kharaab honaa thaa Aao mil jaao muskuraa ke gale Ho chukaa jo itaab honaa thaa Koocha-e-ishq men nikal aayaa Jis ko khaana-kharaab honaa thaa Mast-e-jaam-e-sharaab khaak hote Gharq-e-jaam-e-sharaab honaa thaa Dil ki jis par hain naqsh-e-rangaa-rang Us ko saada kitaab honaa thaa Ham ne naakaamiyon ko DhoonD liyaa Aakhirash kaamyaab honaa thaa Haa.e wo lamha-e-sukoon ki jise Mahshar-e-iztiraab honaa thaa Nigah-e-yaar khud taDap uThtee Shart-e-avval kharaab honaa thaa Kyuun na hota sitam bhee be-paayaan Karam-e-be-hisaab honaa thaa Kyuun nazar hairaton men Doob ga.ee Mauj-e-sad-iztiraab honaa thaa Ho chukaa roz-e-avvaleen hee 'jigar' Jis ko jitnaa kharaab honaa thaa