jo ab bhi na takliif farmaaiyegaa

Jo ab bhee na takleef farmaa.iyegaa To bas haath malte hee rah jaa.iyegaa Nigaahon se chhup kar kahaan jaa.iyegaa Jahaan jaa.iyegaa hamen paa.iyegaa Miraa jab buraa haal sun paa.iyegaa Khiraamaan khiraamaan chale aa.iyegaa MiTaa kar hamen aap pachhtaa.iyegaa Kamee koi mahsoos farmaa.iyegaa Nahin khel naaseh junoon kee haqeeqat Samajh leejiyegaa to samjhaa.iyegaa Hamen bhee ye ab dekhnaa hai ki ham par Kahaan tak tavajjoh na farmaa.iyegaa Sitam 'ishq men aap aasaan na samjhen TaDap jaa.iyegaa jo taDpaa.iyegaa Ye dil hai ise dil hee bas rehne diije Karam keejiyegaa to pachhtaa.iyegaa Kaheen chup rahee hai zabaan-e-mohabbat Na farmaa.iyegaa to farmaa.iyegaa Bhulaanaa hamaaraa mubaarak mubaarak Magar shart ye hai na yaad aa.iyegaa Hamen bhee na ab chain aa.egaa jab tak In aankhon men aansoo na bhar laa.iyegaa Tiraa jazba-e-shauq hai be-haqeeqat Zaraa phir to irshaad farmaa.iyegaa Hameen jab na honge to kya rang-e-mahfil Kise dekh kar aap sharmaa.iyegaa Ye maanaa ki de kar hamen ranj-e-furqat Mudaavaa-e-furqat na farmaa.iyegaa Mohabbat mohabbat hee rahtee hai lekin Kahaan tak tabee'at ko behlaa.iyegaa Na hogaa hamaaraa hee aaghosh khaalee Kuch apna bhee pahloo tahee paa.iyegaa Junoon kee 'jigar' koi had bhee hai aakhir Kahaan tak kisee par sitam Dhaa.iyegaa