kaam aakhir jazba e be ikhtiyaar aa hi gaya

Kaam aakhir jazba-e-be-ikhtiyaar aa hee gaya Dil kuch is soorat se taDpaa un ko pyaar aa hee gaya Jab nigaahen uTh ga.iin allaah-ree meraaj-e-shauq Dekhtaa kya hoon wo jaan-e-intizaar aa hee gaya Haa.e ye husn-e-tasavvur kaa fareb-e-rang-o-boo Main ye samjhaa jaise wo jaan-e-bahaar aa hee gaya Haan sazaa de ai khuda-e-ishq ai taufeeq-e-gham Phir zabaan-e-be-adab par zikr-e-yaar aa hee gaya Is tarah khush hoon kisee ke waada-e-fardaa pe main Dar-haqeeqat jaise mujh ko aitbaar aa hee gaya Haa.e kaafir-dil kee ye kaafir junoon-angeziyaan Tum ko pyaar aa.e na aa.e mujh ko pyaar aa hee gaya Dard ne karvaT hee badlee thee ki dil kee aaD se Daf.atan parda uThaa aur parda-daar aa hee gaya Dil ne ik naala kiyaa aaj is tarah deevaana-vaar Baal bikhraa.e koi mastaana-vaar aa hee gaya Jaan hee de dee 'jigar' ne aaj paa-e-yaar par Umr bhar kee be-qaraaree ko qaraar aa hee gaya