kabhi shaakh o sabza o barg par kabhi guncha o gul o khaar par

Kabhee shaakh o sabza o barg par kabhee ghuncha o gul o khaar par Main chaman men chaahe jahaan rahoon miraa haq hai fasl-e-bahaar par Mujhe den na ghaiz men dhamkiyaan giren laakh baar ye bijliyaan Miree saltanat ye hee aashiyaan miree milkiyat ye hee chaar par Jinhen kahiye ishq kee vus.aten jo hain khaas husn kee azmaten Ye usee ke qalb se poochhiye jise fakhr ho gham-e-yaar par Mire ashk-e-khoon kee bahaar hai ki muraqqa-e-gham-e-yaar hai Miree shaa.iree bhee nisaar hai miree chashm-e-sehr-nigaar par Ajab inqilaab-e-zamaana hai miraa mukhtasar saa fasaana hai Yahee ab jo baar hai dosh par yahee sar thaa zaanu-e-yaar par Ye kamaal-e-ishq kee saazishen ye jamaal-e-husn kee naazishen Ye inaayaten ye navaazishen miree ek musht-e-ghubaar par Miree samt se use ai sabaa ye payaam-e-aakhir-e-gham sunaa Abhee dekhnaa ho to dekh jaa ki khizaan hai apnee bahaar par Ye fareb-e-jalva hai sar-ba-sar mujhe Dar ye hai dil-e-be-khabar Kaheen jam na jaa.e tiree nazar inheen chand naqsh o nigaar par Main raheen-e-dard sahee magar mujhe aur chaahiye kya 'jigar' Gham-e-yaar hai miraa shefta main farefta gham-e-yaar par