kisi suurat numuud e soz e pinhaanii nahin jaatii

Kisee soorat numood-e-soz-e-pinhaanee nahin jaatee Bujhaa jaataa hai dil chehre kee taabaanee nahin jaatee Nahin jaatee kahaan tak fikr-e-insaanee nahin jaatee Magar apnee haqeeqat aap pahchaanee nahin jaatee Nigaahon ko khizaan-naa-aashnaa bannaa to aa jaa.e Chaman jab tak chaman hai jalva-saamaanee nahin jaatee Pasheemaan-e-sitam wo dil hee dil men rahte hain lekin Khushaa husne ki tarz-e-naa-pasheemaanee nahin jaatee Mizaaj-e-ahl-e-dil be-kaif-o-mastee rah nahin saktaa Ki jaise nik.hat-e-gul se pareshaanee nahin jaatee Sadaaqat ho to dil seenon se khinchne lagte hain vaa.iz Haqeeqat khud ko manvaa letee hai maanee nahin jaatee Bulandee chaahiye insaan kee fitrat men posheeda Koi ho bhes lekin shaan-e-sultaanee nahin jaatee Ga.e wo din ki dil sarmaaya-daar-e-dard-e-paiham thaa Magar aankhon kee ab tak meer-saamaanee nahin jaatee Jise raunaq tire qadmon ne de kar chheen lee raunaq Wo laakh aabaad ho us ghar kee veeraanee nahin jaatee Wo yuun dil se guzarte hain ki aahaT tak nahin hotee Wo yuun awaaz dete hain ki pahchaanee nahin jaatee Mujhe to kar diyaa sairaab saaqee ne mire lekin Miree sairaabiyon kee tishna-saamaanee nahin jaatee Nahin ma.aloom kis aalam men husn-e-yaar dekhaa thaa Koi aalam ho lekin dil kee hairaanee nahin jaatee Jale jaate hain baDh baDh kar miTe jaate hain gir gir kar Huzoor-e-sham.a parvaanon kee naadaanee nahin jaatee Mohabbat men ik aisa vaqt bhee dil par guzartaa hai Ki aansoo khushk ho jaate hain tughyaanee nahin jaatee 'jigar' wo bhee ze-sar-taa-paa mohabbat hee mohabbat hain Magar un kee mohabbat saaf pahchaanee nahin jaatee