koi ye kah de gulshan gulshan

Koee ye kah de gulshan gulshan Laakh balaa.en ek nasheman Qaatil rahbar qaatil rahzan Dil saa dost na dil saa dushman Phuul khile hain gulshan gulshan Lekin apna apna daaman Ishq hai pyaare khel naheen hai Ishq hai kaare-sheesha-o-aahan Khair mizaaj-e-husn kee yaa-rab Tez bahut hai dil kee dhaDkan Aa ki na jaane tujh bin kab se Ruuh hai laasha jism hai madfan Aaj na jaane raaz ye kya hai Hijr kee raat aur itnee raushan Umren beeteen sadiyaan guzreen Hai vahee ab tak ishq kaa bachpan Tujh saa haseen aur khoon-e-mohabbat Vahm hai shaayad surkhi-e-daaman Barq-e-havaadis allaah allaah Jhuum rahee hai shaakh-e-nasheman Too ne sulajh kar gesoo-e-jaanaan Aur baDhaa dee shauq kee uljhan Rahmat hogee taalib-e-isyaan Rashk karegee paakee-e-daaman Dil ki mujassam aa.eena-saamaan Aur wo zaalim aa.eena-dushman BaiThe ham har bazm men lekin JhaaD ke uTThe apna daaman Hastee-e-shaa.er allaah allaah Husn kee manzil ishq kaa maskan Rangeen fitrat saada tabee.at Farsh-nasheen aur arsh-nasheman Kaam adhooraa aur aazaadee Naam baDe aur thoDe darshan Sham.a hai lekin dhundlee dhu.dlee Saayaa hai lekin raushan raushan KaanTon kaa bhee haq hai Kuch aakhir Kaun chhuDaa.e apna daaman Chaltee phirtee Chaaon hai pyaare Kis kaa sahraa kaisaa gulshan