nargis e mastaana
— Jigar Moradabadi
Apna hee saa ai nargis-e-mastaana banaa de
Main jab tujhe jaanoon mujhe deevaana banaa de
Har qaid se har rasm se begaana banaa de
Deevaana banaa de mujhe deevaana banaa de
Ik barq-e-adaa khirman-e-hastee pe giraa kar
Nazron ko miree tuur kaa afsaana banaa de
Har dil hai tiree bazm men labrez-e-mai-e-ishq
Ik aur bhee paimaana se paimaana banaa de
Too saaqi-e-mai-khaana bhee too nashsha o mai bhee
Main tishna-e-hastee mujhe mastaana banaa de
Allaah ne tujh ko mai o mai-khaana banaayaa
Too saaree fazaa ko mai o mai-khaana banaa de
Too saaqi-e-mai-khaana hai main rind-e-balaa-nosh
Mere liye mai-khaane ko paimaana banaa de
Yaa deeda-o-dil men mire too aap samaa jaa
Yaa phir dil-o-deeda hee ko veeraana banaa de
Qatre men wo Dariya hai jo aalam ko Dubo de
Zarre men wo sahraa hai ki deevaana banaa de
Lekin mujhe har qaid-e-ta.ayyun se bachaa kar
Jo chaahe wo ai nargis-e-mastaana banaa de
Aalam to hai deevaana jigar! husn kee khaatir
Too apne liye husn ko deevaana banaa de
Kab tak nigah-e-yaar na hogee mutabassim
Too apna har andaaz hareefaana banaa de
Munkir too na ban husn ke e.ajaaz-e-nazar kaa
Kahne ke liye apne ko begaana banaa de
Jab tak karam-e-khaas kaa Dariya na umanD aa.e
Too aur bhee haal apna safeehaana banaa de
But-khaane aa nikle to ka.aba kee binaa Daal
Ka.abe men pahunch jaa.e to but-khaana banaa de
Jo mauj uThe dil se tire josh-e-talab men
Sar rakh ke vaheen sajda-e-shukraana banaa de
Jab maa.il-e-altaaf nazar aa.e wo khud-been
Too har nigah-e-shauq ko afsaana banaa de
Kaunain bhee mil jaa.e to daaman ko na phailaa
Kaunain ko bhoolaa huaa afsaana banaa de
Phir arz kar is tarah 'jigar' shauq o adab se
Bebaak agar jur.at-e-rindaana banaa de
Tujh ko nigah-e-yaar! qasam mere junoon kee
Naaseh ko bhee meraa hee saa deevaana banaa de
Main hoon tire qadmon men mujhe kuch nahin kahnaa
Ab jo bhee tiraa lutf-e-kareemaana banaa de
Apna hi sa ai nargis-e-mastana bana de
Main jab tujhe jaanun mujhe diwana bana de
Har qaid se har rasm se begana bana de
Diwana bana de mujhe diwana bana de
Ek barq-e-ada KHirman-e-hasti pe gira kar
Nazron ko meri tur ka afsana bana de
Har dil hai teri bazm mein labrez-e-mai-e-ishq
Ek aur bhi paimana se paimana bana de
Tu saqi-e-mai-KHana bhi tu nashsha o mai bhi
Main tishna-e-hasti mujhe mastana bana de
Allah ne tujh ko mai o mai-KHana banaya
Tu sari faza ko mai o mai-KHana bana de
Tu saqi-e-mai-KHana hai main rind-e-bala-nosh
Mere liye mai-KHane ko paimana bana de
Ya dida-o-dil mein mere tu aap sama ja
Ya phir dil-o-dida hi ko virana bana de
Qatre mein wo dariya hai jo aalam ko Dubo de
Zarre mein wo sahra hai ki diwana bana de
Lekin mujhe har qaid-e-tayyun se bacha kar
Jo chahe wo ai nargis-e-mastana bana de
Aalam to hai diwana jigar! husn ki KHatir
Tu apne liye husn ko diwana bana de
Kab tak nigah-e-yar na hogi mutabassim
Tu apna har andaz harifana bana de
Munkir tu na ban husn ke eajaz-e-nazar ka
Kahne ke liye apne ko begana bana de
Jab tak karam-e-KHas ka dariya na umanD aae
Tu aur bhi haal apna safihana bana de
But-KHane aa nikle to kaba ki bina Dal
Kabe mein pahunch jae to but-KHana bana de
Jo mauj uThe dil se tere josh-e-talab mein
Sar rakh ke wahin sajda-e-shukrana bana de
Jab mail-e-altaf nazar aae wo KHud-bin
Tu har nigah-e-shauq ko afsana bana de
Kaunain bhi mil jae to daman ko na phaila
Kaunain ko bhula hua afsana bana de
Phir arz kar is tarah 'jigar' shauq o adab se
Bebak agar jurat-e-rindana bana de
Tujh ko nigah-e-yar! qasam mere junun ki
Naseh ko bhi mera hi sa diwana bana de
Main hun tere qadmon mein mujhe kuch nahin kahna
Ab jo bhi tera lutf-e-karimana bana de