nazar milaa ke mire paas aa ke luut liyaa

Nazar milaa ke mire paas aa ke luuT liyaa Nazar haTee thee ki phir muskuraa ke luuT liyaa Shikast-e-husn kaa jalva dikhaa ke luuT liyaa Nigaah neechee kiye sar jhukaa ke luuT liyaa Duhaa.ee hai mire allaah kee duhaa.ee hai Kisee ne mujh se bhee mujh ko chhupaa ke luuT liyaa Salaam us pe ki jis ne uThaa ke parda-e-dil Mujhee men rah ke mujhee men samaa ke luuT liyaa Unheen ke dil se koi us kee azmaten poochhe Wo ek dil jise sab Kuch luTaa ke luuT liyaa Yahaan to khud tiree hastee hai ishq ko darkaar Wo aur honge jinhen muskuraa ke luuT liyaa Khushaa wo jaan jise dee ga.ee amaanat-e-ishq Rahe wo dil jise apna banaa ke luuT liyaa Nigaah Daal dee jis par haseen aankhon ne Use bhee husn-e-mujassam banaa ke luuT liyaa BaDe wo aa.e dil o jaan ke looTne vaale Nazar se chheD diyaa gudgudaa ke luuT liyaa Raha kharaab-e-mohabbat hee wo jise too ne Khud apna dard-e-mohabbat dikhaa ke luuT liyaa Koi ye luuT to dekhe ki us ne jab chaahaa Tamaam hastee-e-dil ko jagaa ke luuT liyaa Karishmaa-saazi-e-husn-e-azal are tauba Miraa hee aa.eena mujh ko dikhaa ke luuT liyaa Na luTte ham magar un mast ankhDiyon ne 'jigar' Nazar bachaate hue DabDabaa ke luuT liyaa