niyaaz o naaz ke jhagde mitaae jaate hain

Niyaaz o naaz ke jhagDe miTaa.e jaate hain Ham un men aur wo ham men samaa.e jaate hain Shuroo-e-raah-e-mohabbat are ma.aaz-allaah Ye haal hai ki qadam Dagmagaa.e jaate hain Ye naaz-e-husn to dekho ki dil ko taDpaa kar Nazar milaate naheen muskuraa.e jaate hain Mire junoon-e-tamannaa kaa Kuch khayaal naheen Lajaa.e jaate hain daaman chhuDaa.e jaate hain Jo dil se uThte hain sho.ale wo rang ban ban kar Tamaam manzar-e-fitrat pe chhaa.e jaate hain Main apnee aah ke sadqe ki meree aah men bhee Tiree nigaah ke andaaz paa.e jaate hain Ravaan davaan liye jaatee hai aarzoo-e-visaal Kashaan kashaan tire nazdeek aa.e jaate hain Kahaan manaazil-e-hastee kahaan ham ahl-e-fanaa Abhee Kuch aur ye tohmat uThaa.e jaate hain Miree talab bhee usee ke karam kaa sadqa hai Qadam ye uThte naheen hain uThaa.e jaate hain Ilaahee tark-e-mohabbat bhee kya mohabbat hai Bhulaate hain unhen wo yaad aa.e jaate hain Sunaa.e the lab-e-nai se kisee ne jo naghme Lab-e-'jigar' se mukarrar sunaa.e jaate hain