use haal o qaal se vaasta na garaz maqaam o qayaam se

Use haal-o-qaal se vaasta na gharaz maqaam-o-qayaam se Jise koi nisbat-e-khaas ho tire husn-e-barq-khiraam se Mujhe de rahe hain tasalliyaan wo har ek taaza payaam se Kabhi aa ke manzar-e-aam par kabhi haT ke manzar-e-aam se Kyuun kiyaa raha jo muqaabla khatraat-e-gaam-ba-gaam se Sar-e-baam-e-ishq-e-tamaam tak rah-e-shauq-e-neem-tamaam se Na gharaz kisee se na vaasta mujhe kaam apne hee kaam se Tire zikr se tiree fikr se tiree yaad se tire naam se Mire saaqiyaa mire saaqiyaa tujhe marhabaa tujhe marhabaa Too pilaa.e jaa too pilaa.e jaa isee chashm-e-jaam-ba-jaam se Tiree sub.h-e-aish hai kya balaa tujhe ai falak jo ho hausla Kabhi kar le aa ke muqaabla gham-e-hijr-e-yaar kee shaam se Mujhe yuun na khaak men too milaa main agarche hoon tiraa naqsh-e-paa Tire jalve kee hai baqaa mire shauq-e-naam-ba-naam se Tiree chashm-e-mast ko kya kahoon ki nazar nazar hai fusoon fusoon Ye tamaam hosh ye sab junoon isee ek gardish-e-jaam se Ye kitaab-e-dil kee hain aayaten main bataa.oon kya jo hain nisbaten Mire sajda-haa-e-davaam ko tire naqsh-haa-e-khiraam se Mujhe chaahiye vahee saaqiyaa jo baras chale jo chhalak chale Tire husn-e-sheesha-ba-dast se tiree chashm-e-baada-ba-jaam se Jo uThaa hai dard uThaa kare koi khaak us se gilaa kare Jise zid ho husn ke zikr se jise chiDh ho ishq ke naam se Vaheen chashm-e-hoor phaDak ga.ee abhee pee na thee ki bahak ga.ee Kabhi yak-ba-yak jo chhalak ga.ee kisee rind-e-mast ke jaam se Too hazaar uzr kare magar hamen rashk hai aur hee Kuch 'jigar' Tiree iztiraab-e-nigaah se tire ehtiyaat-e-kalaam se