fikr hi thahrii to dil ko fikr e khuubaan kyuun na ho

Fikr hee Thahree to dil ko fikr-e-khoobaan kyuun na ho Khaak honaa hai to khaak-e-koo-e-jaanaan kyuun na ho Dahr men ai khvaaja Thahree jab aseeree naa-guzeer Dil aseer-e-halqa-e-gesoo-e-pechaan kyuun na ho Ziist hai jab mustaqil aavaaragardee hee kaa naam Aql vaalo phir tavaaf-e-koo-e-jaanaan kyuun na ho Jab nahin mastooriyon men bhee gunaahon se najaat Dil khule bandon ghareeq-e-bahr-e-isyaan kyuun na ho Ik na ik hangaame par mauqoof hai jab zindagee Mai-kade men rind raqsaan o ghazal-khvaan kyuun na ho Jab khush o naa-khush kisee ke haath men denaa hai haath Ham-nasheen phir bai.at-e-jaam-e-zar-afshaan kyuun na ho Jab bashar kee dastaras se duur hai hablul-mateen Dasht-e-vahshat men phir ik kaafir kaa daamaan kyuun na ho Ek hai jab shor-e-jahl o baang-e-hikmat kaa ma.aal Dil halaak-e-zauq-e-gulbaang-e-pareshaan kyuun na ho Ik na ik rif.at ke aage sajda laazim hai to phir Aadmee mahv-e-sujood-e-sarv-e-khoobaan kyuun na ho Ik na ik phande hee men phansnaa hai jab insaan ko Dosh par daam-e-siyaah-e-sumbulistaan kyuun na ho Jab farebon men hee rahnaa hai to ai ahl-e-khirad Lazzat-e-paimaan baar-e-sust-paimaan kyuun na ho Yaan jab aavezish hee Thahree hai to zarre chhoD kar Aadmee khursheed se dast-o-garebaan kyuun na ho Ik na ik zulmat se jab vaabasta rahnaa hai to 'josh' Zindagee par saaya-e-zulf-e-pareshaan kyuun na ho