gudaaz e dil se baatin kaa tajallii zaar ho jaanaa
— Josh Malihabadi
Gudaaz-e-dil se baatin kaa tajallee-zaar ho jaanaa
Mohabbat asl men hai ruuh kaa bedaar ho jaanaa
Naved-e-aish se ai dil zaraa hushyaar ho jaanaa
Kisee taaza museebat ke liye tayyaar ho jaanaa
Wo un ke dil men shauq-e-khud-numaa.ee kaa khayaal aanaa
Wo har shai kaa tabassum ke liye tayyaar ho jaanaa
Mizaaj-e-husn ko ab bhee na samjho to qayaamat hai
Hamaaraa aur wafa ke naam se be-zaar ho jaanaa
Sahar kaa is tarah Angdhaai lenaa dil-farebee se
Udhar shaa.ir ke mahsoosaat kaa bedaar ho jaanaa
Tavassul se tire dil men bharoongaa quvvaten barqee
Zaraa meree taraf bhee ai nigaah-e-yaar ho jaanaa
Wo aaraa.ish men sab quvvat kisee kaa sarf kar denaa
Tahammul men wo har koshish miree bekaar ho jaanaa
Ma.aaz-allaah ab ye rang hai Dunya kee mahfil kaa
Khuda kaa naam lenaa aur zaleel o khvaar ho jaanaa
Ragon se Khoon saaraa zahr ban kar phuuT niklegaa
Zaraa ai 'josh' zabt-e-shauq se hushyaar ho jaanaa