husn aur mazduurii

Ek dosheeza saDak par dhoop men hai be-qaraar ChooDiyaan bajtee hain kankar kooTne men baar baar ChooDiyon ke saaz men ye soz hai kaisaa bharaa Aankh men aansoo banee jaatee hai jis kee har sadaa Gard hai rukhsaar par zulfen aTee hain khaak men Naazukee bal khaa rahi hai deeda-e-ghamnaak men Ho raha hai jazb mahr-e-khoon-chakaan ke roo-ba-roo Kankaron kee nabz men uThtee javaanee kaa lahoo Dhuup men lahraa rahi hai kaakul-e-ambar-sarisht Ho raha hai kam-sinee kaa loch juzv-e-sang-o-khisht Pee rahi hain surkh kirnen mahr-e-aatish-baar kee Nargisee aankhon kaa ras mai champa.ee rukhsaar kee Gham ke baadal khaatir-e-naazuk pe hain chhaa.e hue Aariz-e-rangeen hain yaa do phuul murjhaa.e hue CheethaDon men deedanee hai roo-e-ghamgeen-e-shabaab Abr ke aavaara TukDon men ho jaise maahtaab Uf ye naadaaree mire siine se uThtaa hai dhuaan Aah ai aflaas ke maare hue hindostaan! Husn ho majboor kankar toDne ke vaaste Dast-e-naazuk aur patthar toDne ke vaaste Fikr se jhuk jaa.e wo gardan tuf ai lail o nahaar Jis men honaa chaahiye phoolon kaa ik halkaa saa haar Aasmaan jaan-e-tarab ko vaqf-e-ranjooree kare Sinf-e-naazuk bhuuk se tang aa ke mazdooree kare Us jabeen par aur paseena ho jhalakne ke liye Jo jabeen-e-naaz ho afshaan chhiDakne ke liye Bhiik men wo haath uTThen iltijaa ke vaaste Jin ko qudarat ne banaayaa ho hinaa ke vaaste Naazukee se jo uThaa saktee na ho kaajal kaa baar Un subuk palkon pe baiThe raah kaa bojhal ghubaar Kyuun falak majboor hon aansoo bahaane ke liye AnkhDiyaan hon jo dilon men Doob jaane ke liye Muflisee chhaanTe use qahr-o-ghazab ke vaaste Jis kaa mukhDaa ho shabistaan-e-tarab ke vaaste Fart-e-khushkee se wo lab tarsen takallum ke liye Jin ko qudarat ne taraashaa ho tabassum ke liye Naazneenon kaa ye aalam maathar-e-hind aah aah Kis ke jaur-e-naa-ravaa ne kar diyaa tujh ko tabaah? Hun barastaa tha kabhi din raat teree khaak par Sach bataa ai hind tujh ko khaa ga.ee kis kee nazar Baagh teraa kyuun jahannam kaa namoona ho gaya Aah kyuun teraa bharaa darbaar suunaa ho gaya Sar-barahna kyuun hai wo phoolon kee chaadar kya huee Ai shab-e-taareek teree bazm-e-akhtar kya huee Jis ke aage tha qamar kaa rang pheekaa kya huaa Ai uroos-e-nau tire maathe kaa Tiikaa kya huaa Ai khuda hindostaan par ye nahoosat taa-kujaa? Aakhir is jannat pe dozakh kee hukoomat taa-kujaa? Gardan-e-haq par kharaash-e-tegh-e-baatil taa-ba-kai? Ahl-e-dil ke vaaste tauq-o-salaasil taa-ba-kai? Sar-zameen-e-rang-o-boo par aks-e-gulkhan taa-kujaa? Paak siitaa ke liye zindaan-e-raavan taa-kujaa? Dast-e-naazuk ko rasan se ab chhuDaanaa chaahiye Is kalaa.ee men to kangan jagmagaanaa chaahiye Ek doshiza saDak par dhup mein hai be-qarar ChuDiyan bajti hain kankar kuTne mein bar bar ChuDiyon ke saz mein ye soz hai kaisa bhara Aankh mein aansu bani jati hai jis ki har sada Gard hai ruKHsar par zulfen aTi hain KHak mein Nazuki bal kha rahi hai dida-e-ghamnak mein Ho raha hai jazb mahr-e-KHun-chakan ke ru-ba-ru Kankaron ki nabz mein uThti jawani ka lahu Dhup mein lahra rahi hai kakul-e-ambar-sarisht Ho raha hai kam-sini ka loch juzw-e-sang-o-KHisht Pi rahi hain surKH kirnen mahr-e-atish-bar ki Nargisi aankhon ka ras mai champai ruKHsar ki Gham ke baadal KHatir-e-nazuk pe hain chhae hue Aariz-e-rangin hain ya do phul murjhae hue ChithaDon mein didani hai ru-e-ghamgin-e-shabab Abr ke aawara TukDon mein ho jaise mahtab Uf ye nadari mere sine se uThta hai dhuan Aah ai aflas ke mare hue hindostan! Husn ho majbur kankar toDne ke waste Dast-e-nazuk aur patthar toDne ke waste Fikr se jhuk jae wo gardan tuf ai lail o nahaar Jis mein hona chahiye phulon ka ek halka sa haar Aasman jaan-e-tarab ko waqf-e-ranjuri kare Sinf-e-nazuk bhuk se tang aa ke mazduri kare Us jabin par aur pasina ho jhalakne ke liye Jo jabin-e-naz ho afshan chhiDakne ke liye Bhik mein wo hath uTThen iltija ke waste Jin ko qudarat ne banaya ho hina ke waste Nazuki se jo uTha sakti na ho kajal ka bar Un subuk palkon pe baiThe rah ka bojhal ghubar Kyun falak majbur hon aansu bahane ke liye AnkhDiyan hon jo dilon mein Dub jaane ke liye Muflisi chhanTe use qahr-o-ghazab ke waste Jis ka mukhDa ho shabistan-e-tarab ke waste Fart-e-KHushki se wo lab tarsen takallum ke liye Jin ko qudarat ne tarasha ho tabassum ke liye Nazninon ka ye aalam mathar-e-hind aah aah Kis ke jaur-e-na-rawa ne kar diya tujh ko tabah? Hun barasta tha kabhi din raat teri KHak par Sach bata ai hind tujh ko kha gai kis ki nazar Bagh tera kyun jahannam ka namuna ho gaya Aah kyun tera bhara darbar suna ho gaya Sar-barahna kyun hai wo phulon ki chadar kya hui Ai shab-e-tarik teri bazm-e-aKHtar kya hui Jis ke aage tha qamar ka rang phika kya hua Ai urus-e-nau tere mathe ka Tika kya hua Ai KHuda hindostan par ye nahusat ta-kuja? AaKHir is jannat pe dozaKH ki hukumat ta-kuja? Gardan-e-haq par KHarash-e-tegh-e-baatil ta-ba-kai? Ahl-e-dil ke waste tauq-o-salasil ta-ba-kai? Sar-zamin-e-rang-o-bu par aks-e-gulKHan ta-kuja? Pak sita ke liye zindan-e-rawan ta-kuja? Dast-e-nazuk ko rasan se ab chhuDana chahiye Is kalai mein to kangan jagmagana chahiye