khushk saalii ai dil e afsurda wo asraar e baatin kya hue

Ai dil-e-afsurda wo asraar-e-baatin kya hue Soz kee raaten kahaan hain saaz ke din kya hue Aansuon kee wo jhaDee wo gham kaa saamaan kya huaa Teraa saavan kaa maheena chashm-e-giryaan kya huaa Kyaa huee baalaa-e-sar wo lutf-e-yazdaan kee ghaTaa Aasmaan-e-dil pe wo ghanghor irfaan kee ghaTaa Ab wo naalon kee garaj hai ab na wo shor-e-fughaan Ab na uThtaa hai kaleja se mohabbat kaa dhuaan Apne af.aal-e-siyah par ab pashemaanee nahin Ab paseene ke sitaare zeb-e-peshaanee nahin Dard kee muddat se ab dil men chamak hotee nahin Vo tapak chhaalon kee kaunde kee lapak hotee nahin Zikr-e-maulaa se labon par ab wo narmee hee nahin Bhaap siine se uThe kya dil men garmee hee nahin Ab sharaare soz-e-gham ke dil men rahte hee nahin Ashk ab pichhle pahar aankhon se bahte hee nahin Ma.arifat dil men na ab wo ruuh men ehsaas hai Log kahte hain ki hai lekin hamen to yaas hai Ab na wo aankhon men ashk-e-khoon na wo dil men gudaaz Ab na wo shaam-e-tamannaa hai na wo sub.h-e-niyaaz Khushk hain aankhen jabeenen tang siine sard hain Ab na wo dukhte hue dil hain na chehre zard hain Aah kee aur dil umanD aayaa ye hota hee nahin Duub kar zauq-e-fanaa men koi rotaa hee nahin Phuul daaghon se khile the jis dil-e-sarshaar men Khaak ab muddat se uDtee hai usee gulzaar men Aansuon se nam jo rahtaa tha wo daamaan jal gaya Lahlahaataa tha jo siine men gulistaan jal gaya Ruuh men baaleedgee kee quvvaten ma.adoom hain Donon aankhen aansuon ke faiz se mahroom hain Pech-o-kham se bahne vaalaa dil kaa Dariya khushk hai Vo bharee barsaat ya.anee chashm-e-beenaa khushk hai Khuun hai dil men magar pahlee see tughyaanee nahin Abr hai baad-e-mukhaalif se magar paanee nahin Jab ye aalam hai to baarish kee shikaayat kis liye Be-mahal ye hasrat-e-baaraan-e-rahmat kis liye Ik mujassam khushk-saalee khud hamaaree zaat hai Zid hamaaree hastiyon kee abr hai barsaat hai Rahmaton se josh men aane kee khwaish kya karen Khud saraapaa qaht hain ummeed-e-baarish kya karen Ai dil-e-afsurda wo asrar-e-baatin kya hue Soz ki raaten kahan hain saz ke din kya hue Aansuon ki wo jhaDi wo gham ka saman kya hua Tera sawan ka mahina chashm-e-giryan kya hua Kya hui baala-e-sar wo lutf-e-yazdan ki ghaTa Aasman-e-dil pe wo ghanghor irfan ki ghaTa Ab wo nalon ki garaj hai ab na wo shor-e-fughan Ab na uThta hai kaleja se mohabbat ka dhuan Apne afal-e-siyah par ab pashemani nahin Ab pasine ke sitare zeb-e-peshani nahin Dard ki muddat se ab dil mein chamak hoti nahin Wo tapak chhaalon ki kaunde ki lapak hoti nahin Zikr-e-maula se labon par ab wo narmi hi nahin Bhap sine se uThe kya dil mein garmi hi nahin Ab sharare soz-e-gham ke dil mein rahte hi nahin Ashk ab pichhle pahar aankhon se bahte hi nahin Marifat dil mein na ab wo ruh mein ehsas hai Log kahte hain ki hai lekin hamein to yas hai Ab na wo aankhon mein ashk-e-KHun na wo dil mein gudaz Ab na wo sham-e-tamanna hai na wo subh-e-niyaz KHushk hain aankhen jabinen tang sine sard hain Ab na wo dukhte hue dil hain na chehre zard hain Aah ki aur dil umanD aaya ye hota hi nahin Dub kar zauq-e-fana mein koi rota hi nahin Phul daghon se khile the jis dil-e-sarshaar mein KHak ab muddat se uDti hai usi gulzar mein Aansuon se nam jo rehta tha wo daman jal gaya Lahlahata tha jo sine mein gulistan jal gaya Ruh mein baalidgi ki quwwaten madum hain Donon aankhen aansuon ke faiz se mahrum hain Pech-o-KHam se bahne wala dil ka dariya KHushk hai Wo bhari barsat yani chashm-e-bina KHushk hai KHun hai dil mein magar pahli si tughyani nahin Abr hai baad-e-muKHalif se magar pani nahin Jab ye aalam hai to barish ki shikayat kis liye Be-mahal ye hasrat-e-baran-e-rahmat kis liye Ek mujassam KHushk-sali KHud hamari zat hai Zid hamari hastiyon ki abr hai barsat hai Rahmaton se josh mein aane ki KHwahish kya karen KHud sarapa qaht hain ummid-e-barish kya karen