koi daaraa e jaan hai kya maaluum

Koi daaraa-e-jaan hai kya ma.aloom Yaa faqat daastaan hai kya ma.aloom Kya hudood-e-yaqeen men hai khallaaq Yaa saraasar gumaan hai kya ma.aloom Aarzoo thee khuda ko yaa haajat Kyuun vajood-e-jahaan hai kya ma.aloom Lahv yaa khud men naqs kaa ehsaas Illat-e-ins-o-jaan hai kya ma.aloom Iztiraaran ki ba.ad-e-fikr-e-daqeeq Khil.at-e-een-o-aan hai kya ma.aloom Kis liye kis taraf bahar saa.at Rakhsh-e-hastee davaan hai kya ma.aloom Kis khalaa-e-nazar ke bharne ko Ye zameen aasmaan hai kya ma.aloom Hai kaheen aaftaab-e-zaat-o-sifaat Yaa shuaa-e-bayaan hai kya ma.aloom Kuch nahin hai ba-juz fareb yahaan Aur sab Kuch vahaan hai kya ma.aloom Kis liye aql ke safeene men Naql kaa baadbaan hai kya ma.aloom Chaaploosee men kis liye mashghool Khail-e-karrubiyaan hai kya ma.aloom MalgajaahaT see hai sar-e-gardoon Abr hai yaa dhuaan hai kya ma.aloom Wo tavaanaa.ee hai ki shakhsiyyat Kaun shaah-e-zamaan hai kya ma.aloom Ban ke peechhe hai ik khafee halchal Gard-e-paa kaarvaan hai kya ma.aloom Shar hai kyuun is qadar laheem-o-shaheem Khair kyuun neem-jaan hai kya ma.aloom Shaitanat kyuun hai rashk-e-maah-e-muneer Kyuun risaalat kataan hai kya ma.aloom Kaun said-e-gunaah hai amdan Kyuun jahannum tapaan hai kya ma.aloom Kya havaadis ba-taur-e-mashghala hain Yaa sar-e-imtihaan hai kya ma.aloom Aur kyuun imtihaan ke chakkar men Aalim-o-ghaib-daan hai kya ma.aloom Kaun in faaqa-kash ghareebon kaa Zaamin-e-aab-o-naan hai kya ma.aloom Aankhen labrez hain suboo khaalee Kaun peer-e-mughaan hai kya ma.aloom Sikka-e-maut shahr-e-hastee men Kis khataa par ravaan hai kya ma.aloom Nafs-e-ammaara bakhshne vaalaa Ham se kyuun sar-garaan hai kya ma.aloom Kyuun hamaaree zameen par har aan Karbalaa kaa samaan hai kya ma.aloom Is buree tarah munh se kyuun baahar Aadmee kee zabaan hai kya ma.aloom 'josh' noor-e-khuda pe kyuun haavee Rang-e-roo-e-butaan hai kya ma.aloom