kya gul badanii hai kis darja fusuun kaar wo allaah ganii hai

Kis darja fusoon-kaar wo allaah ghanee hai Kyaa mauja-e-taabindagee o seem-tanee hai Andaaz hai yaa jazba-e-gardoon-zadanee hai Aavaaz hai yaa barbat-e-eemaan-shiknee hai Jangal kee siyah raat hai yaa zulf ghanee hai Kyaa gul-badanee gul-badanee gul-badanee hai Ye lai hai ki khiltee huee ghunche kee kamaanee Mahkaa huaa ye tan hai ki ye raat kee raanee Lahje kee ye rau hai ki barastaa huaa paanee Larzish men ye mizhgaan hai ki pariyon kee kahaanee Ye surkhi-e-lab hai ki aqeeq-e-yamanee hai Kyaa gul-badanee gul-badanee gul-badanee hai Mehraab hai rukhsaar ke partav se zar-afshaan Zulfon men shab-e-taar hai aankhon men charaaghaan Mehndee kee sajaavaT ki hathelee pe gulistaan Yaa halqa-e-ushshaaq men hai chehra-e-taabaan Yaa khaatam-e-taabinda pe hiire kee kanee hai Kyaa gul-badanee gul-badanee gul-badanee hai Siine pe ye palloo hai ki ik mauj-e-hayaabee Maathaa hai ki ik sub.h kaa partav hai shahaabee Aankhen hain ki bahke hue do mast sharaabee Paikar hai ki insaan ke saanche men gulaabee Gesoo hain ki gul-baazee-e-mushk-e-khutanee hai Kyaa gul-badanee gul-badanee gul-badanee hai Kaakul men darakhshaan hai ye peshaanee-e-raqsaan Yaa saaya-e-zulmaat men hai chashma-e-haivaan Haathon pe hai ye chehra ki hai rehl pe qur.aan Aur chehra-e-gul-rang men ghaltaan o kharoshaan Rakhshandagee-e-khoon-e-rag-e-yaasimanee hai Kyaa gul-badanee gul-badanee gul-badanee hai Ishve hain ki ik fauj khaDee luuT rahi hai Chhal-bal hai ki chhaatee ko zameen kuuT rahi hai AngDaa.ee kaa kham hai ki dhanak Toot rahi hai MukhDaa hai ki parbat pe kiran phuuT rahi hai Qaamat hai ki barnaa.ee-e-sarv-e-chamanee hai Kyaa gul-badanee gul-badanee gul-badanee hai Tan men hai wo khushboo ki hain gul sar-ba-garebaan Chehre pe wo surkhee hai ki hairaan gulistaan Vo chaal men hai loch ki shaakhen hain pashemaan Aur la.al-e-guhar-baar pe wo naghma hai ghaltaan Vo naghma ki ik valvala-e-sho.ala-zanee hai Kyaa gul-badanee gul-badanee gul-badanee hai Gardan men chandan-haar hai haathon men hai kangan UmDe hue ishve hain garajtaa huaa jauban Jaulaan hai javaanee ke dhundalke men laDakpan Koraa hai jo pinDaa to junoon-khez hai ubTab Gul-rang shalookaa hai qabaa naardanee hai Kyaa gul-badanee gul-badanee gul-badanee hai Khalvat men wo tasleem hai jalvat men tahakkum Saahil pe subuk-mauj safeene men talaatum Hujre men khamoshee hai shabistaan men takallum Kheme men tunuk aah khayaalon men tarannum Aaghosh men talvaar hai ghoonghaT men banee hai Kyaa gul-badanee gul-badanee gul-badanee hai Har naqsh-e-qadam par hai fidaa taaj-e-kayaanee Har gaam men hai chashma-e-kausar kee ravaanee Har ek bun-e-moo se ubaltee hai javaanee UThtee hai masaamaat se yuun bhaap see dhaanee Goyaa koi mahkee huee chaadar see tanee hai Kyaa gul-badanee gul-badanee gul-badanee hai Kis darja fusun-kar wo allah ghani hai Kya mauja-e-tabindagi o sim-tani hai Andaz hai ya jazba-e-gardun-zadani hai Aawaz hai ya barbat-e-iman-shikni hai Jangal ki siyah raat hai ya zulf ghani hai Kya gul-badani gul-badani gul-badani hai Ye lai hai ki khilti hui ghunche ki kamani Mahka hua ye tan hai ki ye raat ki rani Lahje ki ye rau hai ki barasta hua pani Larzish mein ye mizhgan hai ki pariyon ki kahani Ye surKHi-e-lab hai ki aqiq-e-yamani hai Kya gul-badani gul-badani gul-badani hai Mehrab hai ruKHsar ke partaw se zar-afshan Zulfon mein shab-e-tar hai aankhon mein charaghan Mehndi ki sajawaT ki hatheli pe gulistan Ya halqa-e-ushshaq mein hai chehra-e-taban Ya KHatam-e-tabinda pe hire ki kani hai Kya gul-badani gul-badani gul-badani hai Sine pe ye pallu hai ki ek mauj-e-hayabi Matha hai ki ek subh ka partaw hai shahabi Aankhen hain ki bahke hue do mast sharabi Paikar hai ki insan ke sanche mein gulabi Gesu hain ki gul-bazi-e-mushk-e-KHutani hai Kya gul-badani gul-badani gul-badani hai Kakul mein daraKHshan hai ye peshani-e-raqsan Ya saya-e-zulmat mein hai chashma-e-haiwan Hathon pe hai ye chehra ki hai rehl pe quran Aur chehra-e-gul-rang mein ghaltan o KHaroshan RaKHshandagi-e-KHun-e-rag-e-yasimani hai Kya gul-badani gul-badani gul-badani hai Ishwe hain ki ek fauj khaDi luT rahi hai Chhal-bal hai ki chhati ko zamin kuT rahi hai AngDai ka KHam hai ki dhanak TuT rahi hai MukhDa hai ki parbat pe kiran phuT rahi hai Qamat hai ki barnai-e-sarw-e-chamani hai Kya gul-badani gul-badani gul-badani hai Tan mein hai wo KHushbu ki hain gul sar-ba-gareban Chehre pe wo surKHi hai ki hairan gulistan Wo chaal mein hai loch ki shaKHen hain pasheman Aur lal-e-guhar-bar pe wo naghma hai ghaltan Wo naghma ki ek walwala-e-shoala-zani hai Kya gul-badani gul-badani gul-badani hai Gardan mein chandan-haar hai hathon mein hai kangan UmDe hue ishwe hain garajta hua jauban Jaulan hai jawani ke dhundalke mein laDakpan Kora hai jo pinDa to junun-KHez hai ubTab Gul-rang shaluka hai qaba nardani hai Kya gul-badani gul-badani gul-badani hai KHalwat mein wo taslim hai jalwat mein tahakkum Sahil pe subuk-mauj safine mein talatum Hujre mein KHamoshi hai shabistan mein takallum KHeme mein tunuk aah KHayalon mein tarannum Aaghosh mein talwar hai ghunghaT mein bani hai Kya gul-badani gul-badani gul-badani hai Har naqsh-e-qadam par hai fida taj-e-kayani Har gam mein hai chashma-e-kausar ki rawani Har ek bun-e-mu se ubalti hai jawani UThti hai masamat se yun bhap si dhani Goya koi mahki hui chadar si tani hai Kya gul-badani gul-badani gul-badani hai