lillaahil hamd ki dil shola fishaan hai ab tak

Lillaahil-hamd ki dil shola-fishaan hai ab tak Piir hai jism magar tab.a javaan hai ab tak Barf-baaree hai mah o saal kee sar par lekin Khoon men garmi-e-pahlu-e-butaan hai ab tak Sar pe har chand mah o saal kaa ghaltaan hai ghubaar Fikr men taab-o-tab-e-kaahkashaan hai ab tak Kab se nabzon men wo jhankaar naheen hai phir bhee Sher men zamzama-e-aab-e-ravaan hai ab tak Lillaahil-hamd ki darbaar-e-kharaabaat kee khaak Surma-e-deeda-e-saahib-nazraan hai ab tak Zindagee kab se hai kaanTon kee tijaarat se figaar Phir bhee takh.eel men phoolon kee dukaan hai ab tak Farq par vaqt kaa pathraao hai kab se jaaree Zehn men kaargah-e-sheeshagaraan hai ab tak Kis se kahiye ki ba-een fikr miraa taar-e-vajood Zakhma-e-ghaib se larzaan o tapaan hai ab tak Kab se hoon munkir-e-gulbaang-e-malaa.ek phir bhee Dil pe jibreel kee dastak kaa gumaan hai ab tak Kab se hoon basta-e-naaqoos-o-mazaameer-e-butaan Phir bhee siine men koee garm-azaan hai ab tak Sakht hairaan hoon ki is kufr ke jangal men bhee 'josh' Chashm-e-yazdaan miree jaanib nigraan hai ab tak