manaazir e sahar

Kya rooh-fazaa jalva-e-rukhsaar-e-sahar hai Kashmeer dil-e-zaar hai firdaus-e-nazar hai Har phuul kaa chehra araq-e-husn se tar hai Har chiiz men ik baat hai har shai men asar hai Har samt bhaDaktaa hai rukh-e-hoor kaa sho.ala Har zarra-e-naacheez men hai tuur kaa sho.ala Larzish wo sitaaron kee wo zarron kaa tabassum Chashmon kaa wo bahnaa ki fidaa jin pe tarannum Gardoon pe sapedee-o-siyaahi kaa tasaadum Toofaan wo jalvon kaa wo naghmon kaa talaatum UDte hue gesoo wo naseem-e-saharee ke Shaanon pe pareshaan hain yaa baal paree ke Vo phailnaa khushboo kaa wo kaliyon kaa chaTaknaa Vo chaandnee maddham wo samundar kaa jhalaknaa Vo Chaaon men taaron kee gul-e-tar kaa mahaknaa Vo jhoomnaa sabze kaa wo kheton kaa lahaknaa Shaakhon se milee jaatee hain shaakhen wo asar hai Kahtee hai naseem-e-saharee eed-e-sahar hai Khunkee wo bayaabaan kee wo rangeeni-e-sahraa Vo vaadee-e-sarsabz wo taalaab-e-musaffaa Peshaani-e-gardoon pe wo hanstaa huaa taaraa Vo raaste jangal ke wo bahtaa huaa Dariya Har samt gulistaan men wo ambaar gulon ke Shabnam se wo dho.e hue rukhsaar gulon ke Vo ruuh men anvaar-e-khuda sub.h wo saadiq Vo husn jise dekh ke har aankh ho aashiq Vo saadgee insaan kee fitrat ke mutaabiq Zarreen wo ufuq nuur se labrez wo mashriq Vo naghma-e-daa.ood parindon kee sadaa men Pairaahan-e-yoosuf kee wo taaseer havaa men Vo barg-e-gul-e-taaza wo shabnam kee lataafat Ik husn se wo khanda-e-saamaan-e-haqeeqat Vo jalva-e-asnaam wo but-khaane kee zeenat Zaahid kaa wo manzar wo barhaman kee sabaahat Naaqoos ke siine se sadaa.en wo fughaan kee Vo hamd men Duubee huee awaaz azaan kee Aaqaa kaa ghulaamon se ye hai qurb kaa hangaam Dil hote hain sarshaar fanaa hote hain aalaam Chhaa jaatee hai rahmat to baras paDte hain in.aam Is waqt kisee tarah munaasib nahin aaraam Rone men jo lazzat hai to aahon men mazaa hai Ai ruuh khudee chhoD ki nazdeek khuda hai Kya ruh-faza jalwa-e-ruKHsar-e-sahar hai Kashmir dil-e-zar hai firdaus-e-nazar hai Har phul ka chehra araq-e-husn se tar hai Har chiz mein ek baat hai har shai mein asar hai Har samt bhaDakta hai ruKH-e-hur ka shoala Har zarra-e-nachiz mein hai tur ka shoala Larzish wo sitaron ki wo zarron ka tabassum Chashmon ka wo bahna ki fida jin pe tarannum Gardun pe sapedi-o-siyahi ka tasadum Tufan wo jalwon ka wo naghmon ka talatum UDte hue gesu wo nasim-e-sahari ke Shanon pe pareshan hain ya baal pari ke Wo phailna KHushbu ka wo kaliyon ka chaTakna Wo chandni maddham wo samundar ka jhalakna Wo chhanw mein taron ki gul-e-tar ka mahakna Wo jhumna sabze ka wo kheton ka lahakna ShaKHon se mili jati hain shaKHen wo asar hai Kahti hai nasim-e-sahari id-e-sahar hai KHunki wo bayaban ki wo rangini-e-sahra Wo wadi-e-sarsabz wo talab-e-musaffa Peshani-e-gardun pe wo hansta hua tara Wo raste jangal ke wo bahta hua dariya Har samt gulistan mein wo ambar gulon ke Shabnam se wo dhoe hue ruKHsar gulon ke Wo ruh mein anwar-e-KHuda subh wo sadiq Wo husn jise dekh ke har aankh ho aashiq Wo sadgi insan ki fitrat ke mutabiq Zarrin wo ufuq nur se labrez wo mashriq Wo naghma-e-daud parindon ki sada mein Pairahan-e-yusuf ki wo tasir hawa mein Wo barg-e-gul-e-taza wo shabnam ki latafat Ek husn se wo KHanda-e-saman-e-haqiqat Wo jalwa-e-asnam wo but-KHane ki zinat Zahid ka wo manzar wo barhaman ki sabahat Naqus ke sine se sadaen wo fughan ki Wo hamd mein Dubi hui aawaz azan ki Aaqa ka ghulamon se ye hai qurb ka hangam Dil hote hain sarshaar fana hote hain aalam Chha jati hai rahmat to baras paDte hain inam Is waqt kisi tarah munasib nahin aaram Rone mein jo lazzat hai to aahon mein maza hai Ai ruh KHudi chhoD ki nazdik KHuda hai