mauj e Dariya pe chhaa raha hai ye kaun

Mauj-e-Dariya pe chhaa raha hai ye kaun Sej par rasmasaa raha hai ye kaun Sub.h panghaT pe ho rahee hai tulooa Rukh se kaakul haTaa raha hai ye kaun Adh-khulee ankhDiyon ko mal mal kar Joo-e-pul men nahaa raha hai ye kaun Bojhal anfaas ke talaatum se Be-sadaa jhanjhanaa raha hai ye kaun Aanch goyaa havaa men zer-o-zabar Niind men sansanaa raha hai ye kaun Sat.h-e-Dariya pe chaandnee jaise Chaunk kar muskuraa raha hai ye kaun KarvaTon ke giraa.e takiyon ko Kasmasaa kar uThaa raha hai ye kaun Roo-e-naa-shusta ke dhundalke men Ras kee boonden giraa raha hai ye kaun Ek Angdhaai se do-aalam ko Raagnee men jhulaa raha hai ye kaun Niind kee rau men sham.a ke maanind Sub.h ko jhilmilaa raha hai ye kaun Sharm se champa.ee kalaa.ee men Sabz chauDee ghumaa raha hai ye kaun Dair-e-sub.h-e-bahaar kee zanjeer Rang-e-rukh se hilaa raha hai ye kaun AnkhDiyaan jald jald jhapkaa kar Surkh Dore bajaa raha hai ye kaun Kardgaaraa mire dar-e-dil ko Sub.h-dam khaTkhaTaa raha hai ye kaun Tegh dosheezgee ke paanee se Aag dil men lagaa raha hai ye kaun Tah-ba-tah kar ke biich kee unglee Band muTThee bajaa raha hai ye kaun Zer-e-dandaan dabaa ke surkh angusht Umr apnee bataa raha hai ye kaun Jo bahut duur jaa chukaa thaa use Paas apne bulaa raha hai ye kaun Ahd-e-sheb-o-shabaab ke maabain Faaslon ko haTaa raha hai ye kaun Gul paDaa hai jo ek muddat se Us diye ko jalaa raha hai ye kaun So chukee hai jo ik zamaane se Is khalish ko jagaa raha hai ye kaun Meree sehat se bad-maza ho kar Rog dil ko lagaa raha hai ye kaun Ek muddat se jo mufakkir hai Us ko mutrib banaa raha hai ye kaun Mujh se maghroor-o-bad-dimaagh kaa sar Apne dar par jhukaa raha hai ye kaun Koree aankhon ke taaza ashkon se Ik nayaa gul khilaa raha hai ye kaun Soz-e-pinhaan men Dhaal kar mukhDaa Saaz mere hilaa raha hai ye kaun Aql ke qasr-e-be-niyaazee par Naaz ke ghan chalaa raha hai ye kaun Meree daanish-varee ke lohe ko Taab-e-rukh se galaa raha hai ye kaun Mujh men ik guuna be-rukhee paa kar Khud-kushee se Daraa raha hai ye kaun 'josh' mere khanDar ko az-sar-e-nau Raajdhaanee banaa raha hai ye kaun