meri haalat dekhiye aur un ki suurat dekhiye

Meree haalat dekhiye aur un kee soorat dekhiye Phir nigaah-e-ghaur se qaanoon-e-qudrat dekhiye Sair-e-mahtaab-o-kavaakib se tabassum taa-bake Ro rahi hai wo kisee kee sham-e-turbat dekhiye Aap ik jalva saraasar main saraapaa ik nazar Apnee haajat dekhiye meree zaroorat dekhiye Apne saamaan-e-ta.ayyush se agar fursat mile Bekason kaa bhee kabhi tarz-e-ma.eeshat dekhiye Muskuraa kar is tarah aayaa na kiije saamne Kis qadar kamzor hoon main meree soorat dekhiye Aap ko laayaa hoon veeraanon men ibrat ke liye Hazrat-e-dil dekhiye apnee haqeeqat dekhiye Sirf itne ke liye aankhen hamen bakhshee ga.iin Dekhiye dunya ke manzar aur ba-ibrat dekhiye Maut bhee aa.ee to chehre par tabassum hee raha Zabt par hai kis qadar ham ko bhee qudrat dekhiye Ye bhee koi baat hai har waqt daulat kaa khayaal Aadmee hain aap agar to aadmiyat dekhiye PhuuT niklegaa jabeen se ek chashma husn kaa Sub.h uTh kar khanda-e-saamaan-e-qudrat dekhiye Rash.ha-e-shabnam bahaar-e-gul farogh-e-mehr-o-maah Vaah kya ash.aar hain deevaan-e-fitrat dekhiye Is se baDh kar aur ibrat kaa sabaq mumkin nahin Jo nashaat-e-zindagee the un kee turbat dekhiye Thee khataa un kee magar jab aa ga.e wo saamne Jhuk ga.iin meree hee aankhen rasm-e-ulfat dekhiye Khush-numaa yaa bad-numaa ho dahr kee har chiiz men 'josh' kee takh.eel kahtee hai ki nudrat dekhiye