milaa jo mauqaa to rok duungaa jalaal roz e hisaab teraa

Milaa jo mauqa.a to rok doongaa 'jalaal' roz-e-hisaab teraa PaDhoongaa rahmat kaa vo qaseeda ki hans paDegaa itaab teraa Yahee to hain do sutoon-e-mahkam inheen pe qaa.im hai nazm-e-aalam Yahee to hai raaz-e-khuld-o-aadam nigaah meree shabaab teraa Sabaa tasadduq tire nafas par chaman tire pairahan pe qurbaan Naseem-e-dosheezgee men kaisaa basaa huaa hai shabaab teraa Tamaam mahfil ke roo-ba-roo go uThaa.een nazren milaa.een aankhen Samajh sakaa ek bhee na lekin savaal meraa javaab teraa Hazaar shaakhen adaa se lachkeen huaa na teraa saa loch paidaa Shafaq ne kitne hee rang badle milaa na rang-e-shabaab teraa Idhar miraa dil taDap raha hai tiree javaanee kee justujoo men Udhar mire dil kee aarzoo men machal raha hai shabaab teraa Karegee donon kaa chaak parda rahegaa donon ko kar ke rusvaa Ye shorish-e-zauq-e-deed meree ye ehtimaam-e-hijaab teraa JaDen pahaaDon kee Toot jaateen falak to kya arsh kaanp uThtaa Agar main dil par na rok letaa tamaam zor-e-shabaab teraa Bhalaa huaa 'josh' ne haTaayaa nigaah kaa chashm-e-tar se parda Balaa se jaatee rahen gar aankhen khulaa to band-e-naqaab teraa