phir aashnaa e lazzat e dard e jigar hain ham

Phir aashnaa-e-lazzat-e-dard-e-jigar hain ham Phir mahram-e-kashaakash-e-har-khair-o-shar hain ham Har saans de rahi hai khabar kaa.enaat kee Phir baada-e-jamaal se yuun be-khabar hain ham Phir ishq kee nazar men hai maashooqiyat kaa naaz Phir husn-e-dil-navaaz se sheer-o-shakar hain ham Jiine ke ishtiyaaq se hai phir rameedgee Phir seena-e-hayaat men azm-e-safar hain ham Hoshyaar-baash zulmat-e-gham-khaana-e-hayaat Phir markaz-e-tajalli-e-shams-o-qamar hain ham Kis zom men hai ai shab-e-daijoor-e-zindagee Phir raazdaar-e-noor-e-tuloo-e-sahar hain ham Hai kis khayaal-e-khaam men ai khaarzaar-e-dahr Phir kaamraan-e-khanda-e-gul-haa-e-tar hain ham Phir zindagee hai gham kee amaanat liye hue Har daulat-e-nashaat se phir bahra-var hain ham Phir faiz-e-aashiqee se ba-een be-bazaa.atee Jeb-e-jahaan men daulat-e-laal-o-guhar hain ham Phir baavajood-e-faqr wo haasil hai tumtaraaq Too ye kahe ki saahib-e-taaj-o-kamar hain ham Aankhon men noor-e-mus.haf-e-jaanaan liye hue Phir kardgaar-e-ishq ke paighaam-bar hain ham Khulte nahin hain 'josh' dimaaghon pe dil ke raaz Baalaa-tar az rasaa.i-e-naqd-o-nazar hain ham