phir sar kisi ke dar pe jhukaae hue hain ham

Phir sar kisee ke dar pe jhukaa.e hue hain ham Parde phir aasmaan ke uThaa.e hue hain ham Chhaa.ee huee hai ishq kee phir dil pe be-khudee Phir zindagee ko hosh men laa.e hue hain ham Jis kaa har ek juzv hai ikseer-e-zindagee Phir khaak men wo jins milaa.e hue hain ham Haan kaun poochhtaa hai khushee kaa nahufta raaz Phir gham kaa baar dil pe uThaa.e hue hain ham Haan kaun dars-e-ishq-e-junoon kaa hai khvaast-gaar Aa.e ki har sabaq ko bhulaa.e hue hain ham Aa.e jise ho jaada-e-rif.at kee aarzoo Phir sar kisee ke dar pe jhukaa.e hue hain ham Bai.at ko aa.e jis ko ho tahqeeq kaa khayaal Kaun-o-makaan ke raaz ko paa.e hue hain ham Hastee ke daam-e-sakht se uktaa gaya hai kaun Kah do ki phir giraft men aa.e hue hain ham Haan kis ke paa-e-dil men hai zanjeer-e-aab-o-gil Kah do ki daam-e-zulf men aa.e hue hain ham Haan kis ko justujoo hai naseem-e-faraagh kee Aasoodgee ko aag lagaa.e hue hain ham Haan kis ko sair-e-arz-o-samaa kaa hai ishtiyaaq Dhoonee phir us galee men ramaa.e hue hain ham Jis par nisaar kaun-o-makaan kee haqeeqaten Phir 'josh' us fareb men aa.e hue hain ham