rishvat

Log ham se roz kahte hain ye aadat chhoDiye Ye tijaarat hai khilaaf-e-aadmiyat chhoDiye Is se bad-tar lat nahin hai koi ye lat chhoDiye Roz akhbaaron men chhaptaa hai ki rishvat chhoDiye Bhuul kar bhee jo koi letaa hai rishvat chor hai Aaj qaumee paagalon men raat din ye shor hai Kis ko samjhaa.en use khoden to phir paa.enge kya Ham agar rishvat nahin lenge to phir khaa.enge kya Qaid bhee kar den to ham ko raah par laa.enge kya Ye junoon-e-ishq ke andaaz chhuT jaa.enge kya Mulk bhar ko qaid kar de kis ke bas kee baat hai Khair se sab hain koi do-chaar das kee baat hai Ye havas ye chor baazaaree ye mahngaa.ee ye bhaav Raa.ee kee qeemat ho jab parbat to kyuun na aa.e taav Apnee tankhvaahon ke naale men hai paanee aadh-paav Aur laakhon Tan kee bhaaree apne jeevan kee hai naav Jab talak rishvat na len ham daal gal saktee nahin Naav tankhvaahon ke paanee men to chal saktee nahin Rishvaton kee zindagee hai chor-baazaaree ke saath Chal rahi hai be-zaree ahkaam-e-zardaaree ke saath Phurtiyaan choohon kee hain billee kee tarraaree ke saath Aap roken khvaah kitnee hee sitamgaaree ke saath Ham nahin hilne ke sun liije kisee bhaunchaal se Kaam ye chaltaa rahegaa aap ke iqbaal se Ye hai mil vaalaa wo baniyaa hai ye saahookaar hai Ye hai dookaan-daar wo hai ved ye attaar hai Vo agar Thag hai to ye Daaku hai wo baT-maar hai Aaj har gardan men kaalee jiit kaa ik haar hai Haif mulk-o-qaum kee khidmat-guzaaree ke liye Rah ga.e hain ik hameen eemaan-daaree ke liye Bhuuk ke qaanoon men eemaan-daaree jurm hai Aur be-eemaaniyon par sharmsaaree jurm hai Daakuon ke daur men parhez-gaaree jurm hai Jab hukoomat khaam ho to pukhta-kaaree jurm hai Log aTkaate hain kyuun roDe hamaare kaam men Jis ko dekho khair se nangaa hai wo hammaam men Tond vaalon kee to ho aa.eena-daaree vaah vaa Aur ham bhookon ke sar par chaand-maaree vaah vaa Un kee khaatir sub.h hote hee nahaaree vaah vaa Aur ham chaaTaa karen eemaan-daaree vaah vaa SeTh jee to khuub motor men havaa khaate phiren Aur ham sab jootiyaan galiyon men chaTkhaate phiren Khuub haq ke aastaan par aur jhuke apnee jabeen Jaa.iye rehne bhee diije naaseh-e-gardoon-nasheen Tauba tauba ham bhaDee men aa ke aur dekhen zameen Aankh ke andhe nahin hain gaanTh ke puure nahin Ham phaTak sakte nahin parhez-gaaree ke qareeb Aql-mand aate nahin eemaan-daaree ke qareeb Is giraanee men bhalaa kya ghuncha-e-eemaan khile Jau ke daane sakht hain taanbe ke sikke pil-pile Jaa.en kapDe ke liye to daam sun kar dil hile Jab garebaan taa-ba-daaman aa.e to kapDaa mile Jaan bhee de de to saste daam mil saktaa nahin Aadmiyat kaa kafan hai doston kapDaa nahin Sirf ik patloon silvaanaa qayaamat ho gaya Vo silaa.ee lee miyaan darzee ne nangaa kar diyaa Aap ko ma.aloom bhee hai chal rahi hai kya havaa Sirf ik tie kee qeemat ghonT detee hai galaa Halkee Topee sar pe rakhte hain to chakraataa hai sar Aur juute kee taraf baDhiye to jhuk jaataa hai sar Thee buzurgon kee jo banyaa.in wo baniyaa le gaya Ghar men jo gaaDhee kamaa.ee thee wo gaaDhaa le gaya Jism kee ek ek boTee gosht vaalaa le gaya Tan men baaqee thee jo charbee ghee kaa pyaala le gaya Aa.ee tab rishvat kee chiDiyaa pankh apne khol kar Varna mar jaate miyaan kutte kee bolee bol kar Pattharon ko toDte hain aadmee ke ustukhaan Sang-baaree ho to ban jaatee hai himmat saa.ebaan PeT men letee hai lekin bhuuk jab angDaa.iyaan Aur to aur apne bachche ko chabaa jaatee hai maan Kyaa bataa.en baaziyaan hain kis qadar haare hue Rishvaten phir kyuun na len ham bhuuk ke maare hue Aap hain fazl-e-khuda-e-paak se kursee-nasheen Intizaam-e-saltanat hai aap ke zer-e-nageen Aasmaan hai aap kaa khaadim to launDee hai zameen Aap khud rishvat ke zimmedaar hain fidvee nahin Bakhshte hain aap Dariya kashtiyaan khete hain ham Aap dete hain mavaaqe rishvaten lete hain ham Thiik to karte nahin buniyaad-e-naa-hamvaar ko De rahe hain gaaliyaan girtee huee deevaar ko Sach bataa.oon zeb ye deta nahin sarkaar ko Paaliye beemaariyon ko maariye beemaar ko Illa-e-rishvat ko is dunya se rukhsat keejiye Varna rishvat kee dhaDalle se ijaazat deejiye Bad bahut bad-shakl hain lekin badee hai naazneen JaD ko bose de rahe hain peD se cheen-bar-jabeen Aap go paanee ulachte hain ba-tarz-e-dil-nasheen Naav kaa sooraakh lekin band farmaate nahin KoDhiyon par aasteen kab se chaDhaa.e hain huzoor KoDh ko lekin kaleje se lagaa.e hain huzoor Dast-kaaree ke ufuq par abr ban kar chhaa.iye Jahl ke ThanDe lahoo ko ilm se garmaa.iye Kaar-khaane keejiye qaa.em masheenen laa.iye Un zameenon ko jo mahv-e-khvaab hain chaunkaaiye Khvaah kuch bhee ho munDhe ye bail chaDh saktee nahin Mulk men jab tak ki paidaa-vaar baDh saktee nahin Dil men jitnaa aa.e looTen qaum ko shaah-o-vazeer Kheench le khanjar koi joDe koi chille men tiir Be-dhaDak pee kar ghareebon kaa lahoo akDen amiir Devtaa ban kar rahen to ye ghulaamaan-e-haqeer Doston kee gaaliyaan har aan sahne deejiye Khaana-zaadon ko yoonhee shaitaan rehne deejiye Daam ik chhoTe se kuuze ke hain sau jaam-e-biloor Mol lene jaa.en ik qatra to den nahr-o-qusoor Ik diyaa jo bechtaa hai maangtaa hai sham-e-toor Ik zaraa se sang-reze kee hai qeemat koh-e-noor Jab ye aalam hai to ham rishvat se kya tauba karen Tauba rishvat kaisee ham chanda na len to kya karen Zulf us co-operative silsile kee hai daraaz ChheDte hain ham kabhi to wo kabhi rishvat kaa saaz Gaah ham bante hain qumree gaah wo bante hain baaz Aap ko ma.aloom kya aapas kaa ye raaz-o-niyaaz Naav ham apnee khivaate bhee hain aur khete bhee hain Rishvaton ke lene vaale rishvaten dete bhee hain Baadshaahee takht par hai aaj har shai jalva-gar Phir rahe hain Thokaren khaate zar-o-la.al-o-guhar Khaas cheezen qeematen un kee to hain aflaak par Aab-khora munh phulaataa hai aTThannee dekh kar Chauda aane ser kee awaaz sun kar aaj-kal Laal ho jaataa hai ghusse se TamaaTar aaj-kal Nastaran men naaz baaqee hai na gul men rang-o-boo Ab to hai sehn-e-chaman men khaar-o-khas kee aabroo Khurdanee cheezon ke chehron se Tapaktaa hai lahoo Roopa.e kaa rang faq hai ashrafee hai zard-roo Haal ke sikke ko maazee kaa jo sikka dekh le Sau ruupe ke note ke munh par do annee thuuk de Vaqt se pahle hee aa.ee hai qayaamat dekhiye Munh ko Dhaanpe ro rahi hai aadmiyat dekhiye Duur jaa kar kis liye tasveer-e-ibrat dekhiye Apne qibla 'josh' saahab hee kee haalat dekhiye Itnee gambheeree pe bhee mar-mar ke jiite hain janaab Sau jatan karte hain to ik ghoonT piite hain janaab Log hum se roz kahte hain ye aadat chhoDiye Ye tijarat hai KHilaf-e-admiyat chhoDiye Is se bad-tar lat nahin hai koi ye lat chhoDiye Roz aKHbaron mein chhapta hai ki rishwat chhoDiye Bhul kar bhi jo koi leta hai rishwat chor hai Aaj qaumi pagalon mein raat din ye shor hai Kis ko samjhaen use khoden to phir paenge kya Hum agar rishwat nahin lenge to phir khaenge kya Qaid bhi kar den to hum ko rah par laenge kya Ye junun-e-ishq ke andaz chhuT jaenge kya Mulk bhar ko qaid kar de kis ke bas ki baat hai KHair se sab hain koi do-chaar das ki baat hai Ye hawas ye chor bazari ye mahngai ye bhaw Rai ki qimat ho jab parbat to kyun na aae taw Apni tanKHwahon ke nale mein hai pani aadh-paw Aur lakhon Tan ki bhaari apne jiwan ki hai naw Jab talak rishwat na len hum dal gal sakti nahin Naw tanKHwahon ke pani mein to chal sakti nahin Rishwaton ki zindagi hai chor-bazari ke sath Chal rahi hai be-zari ahkaam-e-zardari ke sath Phurtiyan chuhon ki hain billi ki tarrari ke sath Aap roken KHwah kitni hi sitamgari ke sath Hum nahin hilne ke sun lije kisi bhaunchaal se Kaam ye chalta rahega aap ke iqbaal se Ye hai mil wala wo baniya hai ye sahukar hai Ye hai dukan-dar wo hai wed ye attar hai Wo agar Thag hai to ye Daku hai wo baT-mar hai Aaj har gardan mein kali jit ka ek haar hai Haif mulk-o-qaum ki KHidmat-guzari ke liye Rah gae hain ek hamin iman-dari ke liye Bhuk ke qanun mein iman-dari jurm hai Aur be-imaniyon par sharmsari jurm hai Dakuon ke daur mein parhez-gari jurm hai Jab hukumat KHam ho to puKHta-kari jurm hai Log aTkate hain kyun roDe hamare kaam mein Jis ko dekho KHair se nanga hai wo hammam mein Tond walon ki to ho aaina-dari wah wa Aur hum bhukon ke sar par chand-mari wah wa Un ki KHatir subh hote hi nahaari wah wa Aur hum chaTa karen iman-dari wah wa SeTh ji to KHub motor mein hawa khate phiren Aur hum sab jutiyan galiyon mein chaTKHate phiren KHub haq ke aastan par aur jhuke apni jabin Jaiye rehne bhi dije naseh-e-gardun-nashin Tauba tauba hum bhaDi mein aa ke aur dekhen zamin Aankh ke andhe nahin hain ganTh ke pure nahin Hum phaTak sakte nahin parhez-gari ke qarib Aql-mand aate nahin iman-dari ke qarib Is girani mein bhala kya ghuncha-e-iman khile Jau ke dane saKHt hain tanbe ke sikke pil-pile Jaen kapDe ke liye to dam sun kar dil hile Jab gareban ta-ba-daman aae to kapDa mile Jaan bhi de de to saste dam mil sakta nahin Aadmiyat ka kafan hai doston kapDa nahin Sirf ek patlun silwana qayamat ho gaya Wo silai li miyan darzi ne nanga kar diya Aap ko malum bhi hai chal rahi hai kya hawa Sirf ek tie ki qimat ghonT deti hai gala Halki Topi sar pe rakhte hain to chakraata hai sar Aur jute ki taraf baDhiye to jhuk jata hai sar Thi buzurgon ki jo banyain wo baniya le gaya Ghar mein jo gaDhi kamai thi wo gaDha le gaya Jism ki ek ek boTi gosht wala le gaya Tan mein baqi thi jo charbi ghi ka pyala le gaya Aai tab rishwat ki chiDiya pankh apne khol kar Warna mar jate miyan kutte ki boli bol kar Pattharon ko toDte hain aadmi ke ustuKHan Sang-bari ho to ban jati hai himmat saeban PeT mein leti hai lekin bhuk jab angDaiyan Aur to aur apne bachche ko chaba jati hai man Kya bataen baziyan hain kis qadar haare hue Rishwaten phir kyun na len hum bhuk ke mare hue Aap hain fazl-e-KHuda-e-pak se kursi-nashin Intizam-e-saltanat hai aap ke zer-e-nagin Aasman hai aap ka KHadim to launDi hai zamin Aap KHud rishwat ke zimmedar hain fidwi nahin BaKHshte hain aap dariya kashtiyan khete hain hum Aap dete hain mawaqe rishwaten lete hain hum Thik to karte nahin buniyaad-e-na-hamwar ko De rahe hain galiyan girti hui diwar ko Sach bataun zeb ye deta nahin sarkar ko Paliye bimariyon ko mariye bimar ko Illa-e-rishwat ko is duniya se ruKHsat kijiye Warna rishwat ki dhaDalle se ijazat dijiye Bad bahut bad-shakl hain lekin badi hai naznin JaD ko bose de rahe hain peD se chin-bar-jabin Aap go pani ulachte hain ba-tarz-e-dil-nashin Naw ka suraKH lekin band farmate nahin KoDhiyon par aastin kab se chaDhae hain huzur KoDh ko lekin kaleje se lagae hain huzur Dast-kari ke ufuq par abr ban kar chhaiye Jahl ke ThanDe lahu ko ilm se garmaiye Kar-KHane kijiye qaem mashinen laiye Un zaminon ko jo mahw-e-KHwab hain chaunkaiye KHwah kuch bhi ho munDhe ye bail chaDh sakti nahin Mulk mein jab tak ki paida-war baDh sakti nahin Dil mein jitna aae luTen qaum ko shah-o-wazir Khinch le KHanjar koi joDe koi chille mein tir Be-dhaDak pi kar gharibon ka lahu akDen amir Dewta ban kar rahen to ye ghulaman-e-haqir Doston ki galiyan har aan sahne dijiye KHana-zadon ko yunhi shaitan rehne dijiye Dam ek chhoTe se kuze ke hain sau jam-e-bilur Mol lene jaen ek qatra to den nahr-o-qusur Ek diya jo bechta hai mangta hai sham-e-tur Ek zara se sang-reze ki hai qimat koh-e-nur Jab ye aalam hai to hum rishwat se kya tauba karen Tauba rishwat kaisi hum chanda na len to kya karen Zulf us co-operatiwe silsile ki hai daraaz ChheDte hain hum kabhi to wo kabhi rishwat ka saz Gah hum bante hain qumri gah wo bante hain baz Aap ko malum kya aapas ka ye raaz-o-niyaz Naw hum apni khiwate bhi hain aur khete bhi hain Rishwaton ke lene wale rishwaten dete bhi hain Baadshahi taKHt par hai aaj har shai jalwa-gar Phir rahe hain Thokaren khate zar-o-lal-o-guhar KHas chizen qimaten un ki to hain aflak par Aab-KHora munh phulata hai aTThanni dekh kar Chauda aane ser ki aawaz sun kar aaj-kal Lal ho jata hai ghusse se TamaTar aaj-kal Nastaran mein naz baqi hai na gul mein rang-o-bu Ab to hai sehn-e-chaman mein KHar-o-KHas ki aabru KHurdani chizon ke chehron se Tapakta hai lahu Rupae ka rang faq hai ashrafi hai zard-ru Haal ke sikke ko mazi ka jo sikka dekh le Sau rupe ke note ke munh par do anni thuk de Waqt se pahle hi aai hai qayamat dekhiye Munh ko Dhanpe ro rahi hai aadmiyat dekhiye Dur ja kar kis liye taswir-e-ibrat dekhiye Apne qibla 'josh' sahab hi ki haalat dekhiye Itni gambhiri pe bhi mar-mar ke jite hain janab Sau jatan karte hain to ek ghunT pite hain janab